'धोती दिवस' मनाउँदै गर्दा जनमत पार्टी अध्यक्ष र मन्त्रीसहितका कार्यकर्ता पक्राउ 

काठमाडौं- ‘राष्ट्रिय धोती दिवस’ को अवसरमा आयोजित र्‍यालीबाट जनमत पार्टीका अध्यक्ष सिके राउत, पार्टीबाट संघीय मामिला तथा सामान्य प्रशासनमन्त्री अनितादेवीसहितका कार्यकर्ताहरुलाई प्रहरीले पक्राउ गरेको छ। 

प्रहरीका अनुसार जनमत पार्टीका नेता-कार्यकर्ता निषेधित क्षेत्रमा प्रवेश गर्न खोजेपछि पक्राउ गरेको दाबी गरेको छ। 

निषेधित क्षेत्र माइतीघरमा जान लागेपछि मन्त्रीसहित जनमत पार्टीका अध्यक्ष सिके राउतलगायत दर्जनभन्दा बढी पक्राउ परेका हुन्। उनीहरूलाई भृकुटीमण्डपस्थित नेपाल पुलिस क्लबमा राखिएको छ।

काठमाडौं प्रशासनले माइतीघर क्षेत्रमा अहिले कुनै पनि सभा सम्मेलन, प्रदर्शन गर्न रोक लगाएको छ। राष्ट्रिय धोती दिवसको कार्यक्रमा प्रदर्शनकारीहरुले धोती लगाएर दिवस मनाउँदै ‘धोती हाम्रो शान हो’ लगायतका नारा लगाएका थिए।

आज नै नेपालीहरुले टोपी दिवस पनि मनाइरहेका छन्। यी दुवै दिवस स्व:स्फूर्त रुपमा मनाउन थालिएको हो।