सुनिल र रञ्जना अन्तिम आठमा

काठमाडौं- नेपालका सुनिल जोशी र रञ्जना भट्ट दोश्रो दक्षिण एशियाली यु-२१ ब्याडमिन्टन च्याम्पियनसिपको अन्तिम आठमा प्रवेश गरेका छन् । नेपाल ब्याडमिन्टन संघको आयोजनामा भएको प्रतियोगितामा सुनिलले पुरुष एकलमा मालदिभ्सका निबाल अहमदलाई २१-१२, २१-१५ ले पराजित गर्दै अन्तिम आठमा स्थान बनाएका हुन् । 

यस्तै महिला एकल तर्फ रञ्जनाले बंगलादेशकी उर्मी अख्तरलाई २१-१९, २१-१८ ले पाखा लगाईन् । सशस्त्र प्रहरी बलको हलचोकस्थित कभर्डहलमा भएको प्रतियोगित नेपाललाई जित दिलाउने क्रममा नेपालका पिन्स दाहाल, प्रफुल महर्जन र नविन श्रेष्ठले बाजी मारे । 

प्रिन्सले श्रीलङ्काका भिरेन नेतासिंघेलाई २१-९, २१-१६, प्रफुलले मालदिभ्सका माहम्मद राफाहलाई २१-४, २१-८ तथा नविनले बंगलादेशका गौरव सिंहलाई २१-१७, २१-७ ले पराजित गरे । 

महिला एकल तर्फ रञ्जना बाहेक नेपाली खेलाडीले आफुलाई अगाडी बढाउन असफल भए । महिला एकल तर्फ रशिला महर्जन भारतकी माल्भिका बान्सोद संग २१-१०, २१-१२, जेशिका गुरुङ्ग श्रीलङ्काकी दिल्मी दियास संग २१-८, २१-१५ ले तथा सुनैना मुखिया श्रीलङ्काकै २१-८, २१-९ ले पराजित भए ।

यसैगरि अन्य खेलमा पुरुष एकल बंगलादेशका मंगल सिंहले मालदिभ्सका अकिफ मोहम्मदलाई २१-५, २१-१८ ले पराजित गर्दै क्वाटरफाईनल यात्रा तय गरे । क्वाटरफाईनलमा प्रवेश गर्ने क्रममा भारतका प्रियान्सु रजावतले श्रीलङ्काका चिराथ इल्लेपेरुमाचीलाई २१-११, २५-२३, श्रीलङ्काका रन्थुस्का ससिन्दुले आफ्नै देशका चामाथ दियासलाई २१-१६, २१-१९ ले तथा भारतका ध्रुव रावतले श्रीलङ्काका धुमिन्दु अभयविक्रमेलाई २१-११, २१-१७ ले पाखा लगाए । 

यस्तै महिला तर्फ बंगलादेशकी फवरिन विन्ते इमदाद हृदिताले मालदिभ्सकी माशा रशिदलाई १९-२१, २१-१७, २१-१६, श्रीलङ्काकी हसरा विजयरत्नेले मालदिभ्सकी अमिनाथ नविहालाई २१-१०, २१-१९ ले तथा भारतकी पूर्वे बार्भेले बंगलादेशकी रश्मा अख्तरलाई २१-७, २१-७ ले पराजित गर्दै क्वाटरफाईनलको यात्र तय गरे ।