युरोपा लिग : चेल्सीको लगातार पाँचै जित

एजेन्सी- युइएफए युरोपा लिग फुटबलमा इंग्लिश क्लब चेल्सीले ग्रिस क्लब पीएओके सालोनिकाविरुद्ध सहज जित निकालेको छ । बिहिबार राति भएको खेलमा चेल्सीले सालोनिकामाथि ४-० को सहज जित निकालेको हो । 

चेल्सीको जितका लागि ओलिभर जिरुडले २ गोल गर्दा क्यालम हड्सन र अल्भारो मोराटाले एक एक गोल गरे । पहिलो हाफमा दुई गोल गरेको चेल्सीले दोस्रो हाफमा पनि थप दुई गोल गरेको थियो । 

खेलको २७ औं मिनेटमा जिरुडले गोल गर्दै चेल्सीलाई सुरुवाती अग्रता दिलाए । दोस्रो गोल पनि खेलको ३७ औं मिनेटमा जिरुडले नै गरे र चेल्सीको अग्रता दोब्बर पारे । 

दोस्रो हाफमा पथ दुई गोल गर्ने क्रममा खेलको ६० औं मिनेटमा हड्सनले गोल गर्दै चेल्सीको अग्रता तेब्बर पारे । त्यसपछि खेलको ८० औं मिनेटमा मोराटाले गोल गर्दै चेल्सीलाई ४-० को सहज जित दिलाए । 

सालोनिका यव्हेन खाचेरिडीले रातो कार्ड पाएपछि सातौं मिनेटमै १० खेलाडीमा समेटिएको थियो । जसको फाइदा चेल्सीले भरपुर लिएको थियो । जितसँगै समूह ‘एल’ को चेल्सीले १५ अंक जोडेर समूहको शीर्ष स्थानमा यथावत राखेको छ । चेल्सी २ खेल अगावै नकआउट चरणमा पुगिसकेको छ । सालोनिका ३ अंक जोडेर पुछारमा छ  ।