मेस्सीको उत्कृष्ट प्रदर्शनमा बार्सिलोना विजय

एजेन्सी- युइएफए च्याम्पियन्स लिगमा बार्सिलोनाले पिएसभीलाई पराजित गरेको छ । यस जितसँगै बार्सिलोना च्याम्पियन्स लिगको दोस्रो चरणको प्रवेश पक्का गरेको छ । 

बुधबार राति भएको समूह ‘बी’को पाँचौ खेलमा बार्सिलोनाले पीएसभीलाई २-१ ले पराजित गरेसँगै दोस्रो चरणको यात्रा पक्का गरेको हो । यता पीएसभी भने अंक तालिकाको पुछारमा रहदै प्रतियोगिताबाट बाहिरिसकेको छ ।

पहिलो हाफ गोलरहित बराबरीमा सकिएको खेलमा, तीन वटै गोल दोस्रो हाफमा सम्भव भएका थिए । बार्सिलोनाका लागि लियोनल मेस्सी र जेरार्ड पिकेले एक एक गोल गरे । 

यता पिएसभीका लागि पीएसभीका कप्तान लुक डे जोङले एक गोल फर्काएका थिए । पहिलो हाफमा दुबै टोलीले गोल गर्ने केहि अवसरहरु सृजना गरेपनि गोल गर्न भने सकेनन् । 

मेस्सीले खेलको ६१ औं मिनेटमा गोल गर्दै बार्सिलोनालाई सुरुवाती अग्रता दिलाए । उनले ओस्मान डेम्बेलेको पासलाई पेनाल्टी क्षेत्रभित्रबाट गोल गरेका थिए । त्यसको ९ मिनेट नबित्दै बार्सिलोनाले अग्रता दोब्बर पार्यो । 

बार्सिलोनाको अग्रता दोब्बर पार्न जेरार्ड पिकेले गोल गरेका थिए । उनले मेस्सीको फ्रिकिक सापमा गोल गरेका हुन् । ८२ औं मिनेटमा पीएसभीका कप्तान लुक डे जोङले एक गोल फर्काउदै खेलमा फर्कने प्रयास गरेका थिए । 

तर पीएसभीले थप गोल गर्न नसक्दा बार्सिलोना विजयी भयो । समूह चरणको एक खेल बाँकी छँदा बार्सिलोनाले दोस्रो स्थानको स्पर्ससँग ६ अंकको अग्रता कायम गरेको छ । बार्सिलोनाको ५ खेलमा १३ अंक छ भने टोटेनहम र इन्टर मिलानको समान ७-७ अंक छ ।