आज विजोर नम्बरका गाडी मात्रै चलाउन पाइने

काठमाडौँ- काठमाडौं उपत्यकामा सञ्चालन हुने सवारीसाधनमा आजबाट जोर विजोर प्रणाली लागू भएको छ । शुक्रबारदेखि काठमाडौँमा हुने एसिया प्यासफिक समिटका लागि सवारी व्यवस्थापन गर्न भन्दै जोर विजोर प्रणाली लागू गरिएको हो । 

चार दिनसम्म लागू हुने जोर विजोर प्रणाली अन्तर्गत बिहीबार र शनिबार बिजोर नम्बरका सवारीसाधन सञ्चालन हुने छन् भने शुक्रबार र आइतबार जोर नम्बरका सवारीसाधन मात्रै चल्न पाउने छन् । 

सम्मेलनमा विशिष्ठ व्यक्तिको प्रतिनिधित्व रहने भएकाले सवारी व्यवस्थापनका लागि गृह मन्त्रालयको निर्देशन अनुसार जोर बिजोर प्रणाली लागू गरिएको महानगरीय ट्राफिक प्रहरी महाशाखाले जनाएको छ। 

एम्बुलेन्स, दमकल, प्रेस र शैक्षिक संस्थाका सवारी साधनमा भने जोर विजोर प्रणाली लागू नहुने महाशाखाले जनाएको छ । आइएनजीओले गरेको कार्यक्रमका लागि जोर विजोर प्रणाली लागू गरेर जनतालाई सास्ति दिएको भन्दै नागरिक स्तरबाट भने सरकारको आलोचना भएको छ ।