प्रधानसेनापति कपको उपाधि एपिएफलाई

काठमाडौं- साविक विजेता एपिएफ क्लबले प्रधानसेनापति कपको उपाधि जितेको छ । टाइब्रेकरमा एपिएफले आर्मीलाई ४-२ ले पराजित गर्दै प्रधानसेनापति कपको उपाधि जितेको हो । 

निर्धारित समयको खेलमा दुबै टोलीबाट १-१ को बराबरी भएपछि खेलको निर्णय टाइब्रेकरमा पुगेका थियो । जहाँ एपिएफले ४-२ ले बाजि मार्यो । पहिलो हाफमा एपिएफले अग्रता लिएको थियो । 


एपिएफलाई खेलको १९ औं मिनेटमा अनिता बस्नेतले अग्रता दिलाएकी थिइन् । उनले सरु लिम्बूको पासमा सुन्दर गोल गर्दै सुरुवाती अग्रता दिलाएकी हुन् । तर, दोस्रो हाफमा निकै नै आक्रमक देखिएको आर्मीका लागि विमला चौधरीले गोल गरिन् । 

उनको गोल मार्फत आर्मी खेलमा फर्कियो । उनले ६३ औं मिनेटमा पेनाल्टी क्षेत्रभित्रबाट सहजै गोल गरेकि हुन् । निर्धारित समयको खेलमा एक एकको बराबरी भएपछि खेलमा २० मिनेट समय थपिएको थियो । तर, थप समयमा पनि दुबै टोलीबाट गोल हुन सकेन र खेल टाइब्रेकरमा पुग्यो । 


उपाधिसँगै एपिएफले तीन लाख प्राप्त गरेको छ । उपविजेता बनेको आर्मीले एक लाख ५० हजारमा चित्तबुझायो । सेमिफाइनलमा पुगेका पुलिस र प्रदेश नम्बर २ ले  ५०/५० हजार पुरस्कार पाएका छन् । 

प्रतियोगितामा आर्मीकी पुनम जर्गा मगरले सर्वोकृष्ट खेलाडी घोषित हुँदै एकथान स्कुटर प्राप्त गरिन् । उत्कृष्ट फरवार्ड एपिएफकी सावित्रा भण्डारी, मिडफिल्डरमा आर्मीकी विमला चौधरी, डिफेन्डरमा आर्मीकी सुमित्र चौधरी, गोलकिपरमा एपिएफकी एञ्जिला सुब्बा र उत्कृष्ट प्रशिक्षक एपिएफका जनक सिंह घोषित हुँदै जनही रु पाँच हजार प्राप्त गरे । 



विजेता तथा उपविजेता टोलीलाई प्रधानसेनापति पूर्णचन्द्र थापा, राष्ट्रिय खेलकुद पिरिषद्को उपाध्यक्ष पिताम्बर तिमिल्सिना लगायतले पुरस्कार तथा ट्रफी प्रदान गरेका थिए । यही मङ्सिर ५ गतेदेखि प्रतियोगितामा तीन विभागटी टोली, सात प्रदेश तथा भारतको सिक्किम र विहारबाट दुई टोली गरी १२ टोलीको सहभागिता थियो ।