सिटी र लियोन च्याम्पियन्स लिगको नकाउट चरणमा

एजेन्सी- मंगलबार राति भएको युइएफए च्याम्पियन्स लिग फुटबलमा म्यानचेस्टर सिटी लियोनसँग बराबरीमा रोकिएको छ । इंग्लिस क्लब सिटी फ्रेन्च क्लब लियोनसँग २-२ को बराबरीमा रोकिएको हो ।

लियोनको मैदानमा भएको खेलमा बराबरी खेलेसँगै सिटी नकआउट चरणमा प्रवेश गरेको छ । प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । तर, दोस्रो हाफमा दुबै टोलीबाट चार गोल भए । 

खेलको ५५ औं मिनेटमा लियोनले सुरुवाती अग्रता लिएको थियो । लियोनले म्यासवेल कर्नेटले गोलमार्फत सुरुवाती अग्रता लिएको हो । तर, ६२ औं मिनेटमा एम्रिक लापोर्टेले बराबरी गोल गर्दै सिटीलाई खेलमा फर्काएका थिए । 

त्यसपछि खेलको ८१ औं मिनेटमा कर्नेटले व्यक्तिगत दोस्रो गोल गर्दै लियोनलाई २-१ को अग्रता दिलाए । तर, त्यसको तीन मिनेट नबित्दै ८३ औं मिनेटमा सर्जियो अग्युरोले गोल गर्दै सिटीलाई २-२ को बराबरीमा ल्याए । 

यो बराबरीसंगै समूह ‘एफ’ को सिटीले ५ खेलबाट १० अंक जोडेको छ । र, सिटी समूहको शीर्ष स्थानमा समेत रहेको छ । लियोन ५ खेलबाट ७ अंक जोडेर दोस्रो स्थानमा छ । लियोनको पनि नकआउट चरणमा प्रवेश गरेको छ । यसै समूहको अर्को खेलमा शख्तर डोनेक्स्टले होफेनहाइमलाई ३-२ ले पराजित गरेको छ ।