प्रधानन्यायाधीशमा जोशी फेरि सिफारिस, चोलेन्द्र पनि छानिए 

काठमाडौँ- प्रधानन्यायाधीशका लागि संसदीय सुनवाई विशेष समितिबाट अस्विकृत भएका दिपकराज जोशी पुनः प्रधानन्यायाधीशका लागि सिफारिस भएका छन् ।

न्याय परिषद्को मंगलबार साझ बसेको बैठकले भावी प्रधानन्यायाधीशका लागि एकपटक अस्विकृत भैसकेका जोशीसँगै चोलेन्द्रशम्शेर जबराको नाम पनि संवैधानिक परिषद्मा पठाएको छ । 

सर्वोच्च अदालतका दुई न्यायाधीशको नाम वरिष्ठताका आधारमा संवैधानिक परिषद्मा न्याय परिषद्का सचिव नृपध्वज निरौलाले जानकारी दिए । संवैधानिक परिषद्को बैठक बसी न्यायाधीश जोशी र जबराको नाम संसदीय सुनुवाइ समितिमा पठाएपछि सो समितिले सुनुवाइ गरी अनुमोदन गर्ने संवैधानिक व्यवस्था छ । 

प्रधानन्यायाधीश ओमप्रकाश मिश्र आगामी पुसमा उमेर हदका कारण अवकाश पाउदैछन् । प्रधानन्यायाधीशको अवकाश हुने भएपछि भावी प्रधानन्यायाधीशका लागि जोशी र जबराको नाम परिषद्ले पठाएको हो । 

न्यायाधीश जोशीलाई यसअघि नै संसदीय सुनुवाइ समितिले अयोग्य ठहर गरी प्रधानन्यायाधीशका लागि नाम अनुमोदन गरेको थिएन । उनीमाथि शैक्षिक प्रमाण पत्र, उनले गरेका फैसलालगायतका विषयमा प्रश्न उठाइएको थियो । यहि आधारमा संसदीय समितिले उनको नाम अस्विकृत गरेको थियो ।

पुनः उनको नाम सिफारिस भए पनि संवैधानिक परिषद्ले चोलेन्द्र शम्शेरको नाम अनुमोदन गर्न सक्ने स्रोतको दाबी छ ।