‘ए’ डिभिजन लिग : सरस्वतीसँग ब्रिगेड पराजित

काठमाडौं- पल्सर सहिद स्मारक ‘ए’ डिभिजन लिग अन्तर्गत सरस्वती युथ क्लबले दोस्रो जित दर्ता गरेको छ । चौथो चरणको लिगको खेलमा सरस्वती क्लबले ब्रिगेड ब्वाईज क्लबलाई २-१ गोलले पराजित गर्दै लिगमा दोस्रो जित दर्ता गरेको हो । 

एन्फा कम्प्लेक्स सातदोबाटोमा सम्पन्न खेलमा ब्रिगेड र सरस्वतीले पहिलो हाफमा १-१ को बराबरी खेलेका थिए । तर दोस्रो हाफमा सरस्वतीले थप एक गोल गर्दै ब्रिगेड ब्वाईजलाई २-१ ले पराजित गरेको थियो । 

खेलमा रसुरुवाती अग्रता सरस्वतीले नै लिएको थियो । खेलको तेस्रो मिनेटमा बिनोद केसीले दिपेश श्रेष्ठको पास सदुपयोग गर्दै गोल गरेका थिए । तर, खेलको सातौं मिनेटमा ब्रिगेड खेलमा फर्कियो । 

ब्रिगेडका विदेशी खेलाडी अब्दु करिमले कजिम बुशारीको पासमा गोल गर्दै खेल १-१ को बराबरीमा ल्याएका थिए । यसअधि दुवै टोलीले समान एक खेलमा जित र दुई खेलमा हार ब्यहोरेका थिए । 

खेलको ५२ औं मिनेटमा विदेशी खेलाडी फ्रान्सिसले गोल गरेका थिए । जितसँगै सरस्वतीले ३ खेलबाट ६ अंक जोडेको छ । र, सरस्वती सातौ स्थानमा उक्लिएको छ । ३ अंक जोडेका ब्रिगेड ११ औं स्थानमा छ ।