आज सामाजिक सुरक्षा दिवस, प्रधानमन्त्रीले दिए यस्तो सन्देश

काठमाडौं- आजबाट हरेक वर्ष मंसिर ११ गते सामाजिक सुरक्षा दिवस मनाइने भएको छ । प्रधानमन्त्री केपी शर्मा ओलीले आज (मंगलबार) प्रज्ञा प्रतिष्ठान कमलादीमा एक भव्य कार्यक्रमबीच सो दिवसको सुरुवात गर्दै छन् ।

तत्कालीन प्रधानमन्त्री मनमोहन अधिकारी नेतृत्वको सरकारबाट सुरु भएको सामाजिक सुरक्षा योजना विस्तार हुँदै गएपछि सरकारले औपचारिक रूपमै सामाजिक सुरक्षा दिवस मनाउन लागेको हो । 

‘सामाजिक सुरक्षा योजनामा सहभागी बनौं, सुरक्षित भविष्य सुनिश्चत गरौं’ भन्ने मूल नारासहित मनाउन लागिएको उक्त दिवसको आयोजक श्रम रोजगार तथा सामाजिक सुरक्षा मन्त्रालय रहेको छ । सामाजिक सुरक्षा योजनाअन्तर्गत सरकारले वृद्धभत्ता, एकल महिला भत्ता, अपांगता भत्ता, अल्पसंख्यक तथा जातीय भत्तालगायत दिँदै आएको छ ।

प्रधानमन्त्रीको सन्देश

प्रधानमन्त्री केपी शर्मा ओलीले ‘प्रथम सामाजिक सुरक्षा दिवस’ नयाँ युगको शुरुआत भएको बताएका छन् ।

पहिलो सामाजिक सुरक्षा दिवस तथा योगदानमा आधारित सामाजिक सुरक्षा योजना लागू भएको अवसरमा आज शुभकामना सन्देश दिँदै प्रधानमन्त्री ओलीले यस दिवसको दिनबाट सरकारले हुँदा खाने र हुने खाने, रोजगारीमा रहेका र रोजगारी गुमाएका वा नभएका सबैलाई समेट्ने नयाँ प्रणालीको थालनी गरेको बताए ।

सन्देशमा उनले मङ्गलबारदेखि सामाजिक सुरक्षा योजना लागु भएको बताउँदै आफूले अघिल्लो पटक प्रधानमन्त्री हुँदा नै सबैको सहभागितामा सामाजिक सुरक्षाको योजना लागू गर्ने प्रतिबद्धता व्यक्त गरेको उल्लेख गरे ।

“श्रमको सम्मान गर्ने, सबैलाई श्रममा लाग्न उत्प्रेरित गर्ने र आधुनिक सभ्य समाजअनुरुप सबैको संरक्षण गर्ने प्रणालीमा हामी मङ्गलबारबाटै प्रवेश गर्दैछौँ,” प्रधानमन्त्रीको सन्देशमा उल्लेख गरिएको छ  । 

उनले सबै देशवासीहरूलाई सामाजिक सुरक्षा योजना शुभारम्भको अवसरमा सबैलाई सुरक्षित भविष्यको शुभकामनासमेत सन्देशमार्फत व्यक्त गरेका छन् ।  मङ्गलबार पहिलो पटक सरकारले सामाजिक सुरक्षा दिवस मनाउँदैछ । प्रधानमन्त्री ओलीले सामाजिक सुरक्षा योजना शुभारम्भ गर्नेछन् ।

यसैबीच, श्रम, रोजगार तथा सामाजिक सुरक्षामन्त्री गोकर्ण विष्टले सिङ्गो नेपाल र नेपालीका लागि सामाजिक सुरक्षा योजना आम श्रमजीवी नागरिकका लागि गौरवको विषय भएको उल्लेख गर्दै नयाँ युगको शुरुवात हो भनेका छन् ।