टी-१० क्रिकेट : सन्दीपको केरला पन्जाबीसँग ३६ रनले पराजित

काठमाडौं- युएईमा जारी टी-१० क्रिकेट लिगमा नेपाली राष्ट्रिय टोलीका सदस्य सन्दीप लामिछाने सम्मिलित केरला नाइट्स पराजय भएको छ । सोमबार भएको खेलमा केरला पन्जाबी लिजेन्ड्ससँग ३६ रनले पराजित भएको हो ।
 
पन्जाबीविरुद्ध नेपालका लेग स्पिनर सन्दीपले विकेट लिन सकेनन् । अघिल्ला तीन खेलमा ६ विकेट लिएका सन्दीपले चौथो खेलमा महंगा सावित हुँदै विकेट लिन सकेनन् । उनले २ ओभरमा २८ रन खर्चिए । 

यसअघि सन्दीपले पहिलो खेलमा पख्तुनविरुद्ध २ ओभर बलिङ गर्दै १७ रन खर्चेर ३ विकेट लिएका थिए । त्यस्तै दोस्रो खेलमो २ ओभर बलिङ गर्दै १४ रन खर्चिएर १ विकेट लिएका थिए । तेस्रो खेलमा सन्दीपले राजपुट्सविरुद्ध २ ओभर बलिङ गर्दै २३ रन खर्चेर २ विकेट लिएका थिए ।

पन्जाबीले दिएको १०८ रनको लक्ष्य पछ्याएको केरलाले ८ ओभर २ बलमा सबै विकेट गुमाउँदै मात्र ७१ रन जोड्न सक्यो । केरलाका लागि क्रिस गेलले ३५ रन जोड्न बाहेक अन्य ब्याट्सम्यानले दोहोरो अंक छुन सकेनन् । 

सन्दीप १ रनमा अविजित रहे । पन्जाबीका हसन खानले ४ तथा प्रभिन कुमारले ३ विकेट लिए । यसअघि टस हारेर पहिले ब्याटिङ गरेको पन्जाबीले पुरै १० ओभरमा ५ विकेट गुमाएर १०७ रन जोडेको थियो । 

पन्जाबीका उमार अकमलले ३० तथा क्रिस जोर्डनले अविजित २४ रन जोडे । लिगमा केरलाको यो दोस्रो हार हो । यसअघि केरला सिन्धिजसंग पराजित भएको थियो ।