‘ए’ डिभिजन लिग : एफिएफ र मनाङ भिड्दै

काठमाडौं- पल्सर सहिद स्मारक ‘ए’ डिभिजन लिग अन्तर्गत मंगलबार दुई खेल हुदैछन् । पहिलो खेलमा ब्रिगेड ब्वाईज युथ क्लब र सरस्वती युथ क्लबले प्रतिस्पर्धा गर्दै, दोस्रो खेलमा मनाङ मस्र्याङ्दी क्लब र विभागीय टिम एपीएफ आमने सामने हुँदैछन् ।

दुबै खेल एन्फा कम्प्लेक्सको खेलमा मैदानमा हुने छन् । पहिलो खेल ११ बजे हुने छ भने दोस्रो खेल दिउँसो साढे २ बजे सुरु हुनेछ । मंगलबारको खेलमा ब्रिगेड ब्वाईज युथ क्लब र सरस्वती युथ क्लबल आफ्नो जितको खोजिमा रहने छन् । 

दुवै टोली एकमा जित र दुई खेलमा हार ब्यहोरेका टोली हुन् । तेस्रो चरणको खेलमा बलियो विभागीय टोली एपीएफविरुद्ध ३-१ को सहज जित दर्ता गरेको व्रिगेड ब्वाइज पहिलो खेलमा मनाङसँग ३-१ गोलले पराजित भएको थियो । उसले दोस्रो खेलमा रुस्लान थ्रीस्टारसँग ५-१ गोलको हार ब्यहोरेको थियो ।

यता, सरस्वती युथ क्लब पहिलो खेलमा संकटासँग अन्तिम समयमा १-० गोल अन्तरले स्तब्ध बनेको थियो । दोस्रो खेलमा हिमालन शेर्पासँग सोही गोल अन्तरमा पराजित भएको सरस्वतीले तेस्रो खेलमा फ्रेन्ड्सविरुद्ध ३-० को जित निकालेको थियो ।

त्यस्तै दोस्रो खेलमा मैदान उत्रदै गर्दा मनाङको लक्ष्य लिगको शीर्ष स्थानमा उक्लिनु हुनेछ । कमजोर प्रर्दशन गरिरहेको एपीएफविरुद्व जित निकाल्दै लिग तालिकाको अग्रता स्थानमा उक्लिनु पहिलो लक्ष्य हुनेछ । 

लिगमा मनाङको सतप्रतिशत जित छ । एपीएफले एक हार, एक बराबरी र एक जित निकालेको छ । तेस्रो चरणको खेलमा उपाधि दाबेदार थ्रीस्टार क्लबलाई पराजित गरेको मनाङले त्यसअघि एनआरटी र ब्रिगेड ब्वाईजलाई पराजित गरेको थियो । 

एपीएफले पहिलो खेलमा हिमालयन शर्पासँग गोल रहित बराबरी खेलको थियो । दोस्रो खेलमा फ्रेन्ड्सविरुद्व जित निकालेको एपिएफले तेस्रो खेलमा ब्रिगेड ब्वाईजसँग पराजित हुन पुगेको थियो । मनाङ ३ खेलबाट ९ अंक जोड्दै तालिकाको तेस्रो स्थानमा छ । एपीएफ ४ अंक सहित आठौ स्थानमा छ ।