वाइडबडी खरिदमा भएको भ्रष्टाचारको पोल खुल्यो

काठमाडौं- राजधानीबाट प्रकाशित सोमबारका राष्ट्रिय दैनिक अखबारहरुले संसदको लेखा समितिले वाइडबडी खरिदमा घोटला भएकोे ठहर गरेको विषयलाई प्राथमिकतामा पारेका छन् ।

कान्तिपुर दैनिकले वाइडबडीबारे लेखा समितिः साढे ६ अर्ब घोटला शीर्षकमा मुख्य समाचार छापेको छ भने अन्नपूर्ण पोस्ट्ले लेखाले खोज्यो विमानको रित शीर्षकमा खबर लेखेको छ ।  

लेखा समितिले वायुसेवा निगमले वाइडबडी विमान खरिद गर्दा ६ अर्ब ५९ करोड घोटला गरेको निष्कर्ष निकाल्दै यसबारे निगमको लिखित जवाफ माग गरेको छ । विमान ल्याउँदा घोटाला नभई क्रेताले पाउने कमिसन पनि गायब बनाइएको समितिको  निष्कर्ष छ ।

समिति सभापति भरत साहले व्यवसायीका अनुसार जहाज खरिदमा उत्पादकले १० प्रतिशत कमिसन क्रेतालाई दिने गरेको छ । तर २४ अर्बको खरिदमा नेवानिलाई आउनुपर्ने कमिसन २ अर्ब ४० करोड कता गयो ? भनेर प्रश्न गरेका थिए । लेखाका अनुसार कमिसन, अधिकतम उडान भार कटौती र मूल्यान्तर गरी २४ अर्बको खरिदमा ६ अर्ब ५९ करोड घोटाला भएको आजका पत्रपत्रिकाले लेखेको छन् ।  

यस्तै आजको अन्नपूर्णले उखुको अनुदान रकम लिन झन्झटः ८१ ह्जार किसानको ९२ करोड थन्कियो शीर्षकमा प्राथमिकताका साथ खबर छापेको छ । अख्तियारले देशभरका १४ पुलमा अनुसन्धान अघि बढाएको विषयलाई पनि अन्नपूर्णले महत्वका साथ छापेको छ । 

निर्मलाका बुबालाई शिक्षण अस्पताल महाराजगन्ज भर्ना गरिएको विषयलाई एङ्कर न्यूज बनाएको कान्तिपुरले मलेसियामा अलपत्र भएका १० हजार कामदारलाई पुरानै संयन्त्रबाट पठाउने भनि निर्णय गरेको विषयलाई महत्वका साथ प्रकाशित गरेको छ । 

कांग्रेसको विधानमा गुटगत स्वार्थ शीर्षकमा एङ्कर न्यूज छापेको आजको नागरिक दैनिकले मलेसियामा रोजगारीः भेन्डर फेर्न आर्थिक चलखेल शीर्षकमा मुख्य समाचार छापेको छ ।

उसले दाङमा बालुवा प्रशोधनका नाममा नदी दोहन भएको, नेकपामा सरकारको आलोचना गर्दै पत्र लेख्ने २१ केन्द्रिय सदस्यलाई वामदेव गौतमले साथ दिएको र न्यायलयले मुद्दा छिने पनि कार्यान्व्यन नहुने गरेको विषयलाई पहिलो पृष्ठमा स्थान दिएको छ ।