रामजानकी विवाहोत्सवलाई भव्य बनाउने तयारी

जनकपुरधाम-प्राचिन मिथिलाको राजधानी जनकपुरमा रामजानकी विवाहोत्सवको तयारीले तिव्रता पाएको छ । त्रेतायुगमा भगवान राम र सीताको विवाहसम्पन्न भएको मान्यताका साथ यहाँ हरेक वर्ष उल्लास र श्रद्धापूर्वक विवाह पञ्चमीका दिन विवाहोत्सव मनाउने परम्परा रहेको छ ।

भगवान राम अयोध्याबाट जनकपुर आएर शिव धनुष तोडेपछि राजा जनककी छोरी सीतासँग विवाह सम्पन्न भएको मान्यता अनुसार भव्य रुपले विवाहोत्सव  मनाइन्छ ।

२६ मंसिरमा मनाइने रामजानकी विवाहोत्सवलाई भव्यता प्रदान गर्न जानकी मन्दिरदेखि प्रदेश सरकार अहिले तयारीमा जुटेको छ । यस वर्ष विवाहोत्सवमा भारत उत्तर प्रदेशका मुख्यमन्त्री योगी आदित्यनाथ सहभागी हुने भएपछि थप भव्यता दिने तयारी गरिएको छ ।

हालसम्म तय कार्यक्रम अनुसार उत्तर प्रदेशका मुख्यमन्त्री योगी जन्तीको नेतृत्व गर्दै विवाहोत्सवमा सहभागी हुने जानकी मन्दिरका छोटे महन्त रामरोशन दासले जानकारी दिए । उत्तर प्रदेशका मुख्यमन्त्री योगीको रामजानकीको स्वयंभरमा सहभागी हुने प्रमुख कार्यक्रम रहेको महन्त दासले बताए । रामजानकी विवाहोत्सवको अवसरमा भारतको अयोध्याबाट हरेक वर्ष साधुसन्तहरु जन्ती बनेर जनकपुर आउने गरेका छन् । तर, हरेक पाँच वर्षपछि विवाहोत्सवमा अयोध्याबाट विशेष जन्ती आउने परम्परा छ ।

२६ मंसिरमा निजी विमानबाट बिहान १० बजे योगीको जनकपुर पुग्ने कार्यक्रम रहेको बताइएको छ । जनकपुर विमानस्थलबाट योगीको जानकी मन्दिर पुगेर पूजाअर्चनापछि रंगभूमि मैदानमा स्वयंभर कार्यक्रममा सहभागी हुने कार्यक्रम रहेको जानकी मन्दिरका महन्त दासले जानकारी दिए ।

स्वयंभरपछि योगीको मधेश भवनमा आयोजना हुने सम्मान कार्यक्रममा सहभागी हुने कार्यक्रम रहेको जनाइएको छ । मधेश भवनमा मुख्यमन्त्री राउतले उत्तर प्रदेशका मुख्यमन्त्री योगीको सम्मानमा दिवा भोज आयोजना गर्ने कार्यक्रम छ । मुख्यमन्त्री योगीसहित जन्ती बनेर आएका साधुसन्तहरुका लागि दिवा भोजको कार्यक्रम प्रदेश सरकारले राखेको छ ।

उत्तर प्रदेशका मुख्यमन्त्री योगी जनकपुर आउने भएपछि प्रदेश सरकारले यस वर्षको विवाह पञ्चमीलाई थप ऐतिहासिक बनाउन जुटेको छ । प्रदेश २ का मुख्यमन्त्री लालबाबु राउतसहित भौतिक पूर्वाधारमन्त्री जितेन्द्र सोनल, विभिन्न मन्त्रालयका सचिव तथा सुरक्षा निकायका प्रमुखहरुको टोलीले रंगभूमि मैदान तथा जानकी मन्दिर परिसरलगायतका स्थानहरुको स्थलगत निरीक्षणसमेत गरेको छ ।

विवाहोत्सवमा सप्ताहव्यापी कार्यक्रम 

मुलुक संघीयतामा गएपछि प्रदेशको राजधानी जनकपुरमा पहिलो पटक हुन लागेको रामजानकी विवाहोत्सव साताव्यापी कार्यक्रमका साथ मनाइँदै छ । विवाहोत्सवको अवसरमा सात दिनसम्म मनाइने विभिन्न कार्यक्रम जानकी मन्दिरले सार्वजनिक गरिसकेको छ ।

२१ मंसिर देखि २७ मंसिरसम्म मिथिला परम्परा अनुसार विभिन्न वैवाहिक कार्यक्रमहरु जानकी मन्दिरले सार्वजनिक गरेको हो । जस अनुसार २१ गते जनकपुर नगर दर्शन, २२ गते फुलबारी लीला, २३ गते धनुषयज्ञ, २४ गते तिलकोत्सव, २५ गते मटकोर, २६ गते शुभविवाह र २७ गते विवाहोत्सवको समापनमा रामकलेबा जस्ता कार्यक्रमहरु छन् । रामजानकी विवाहोत्सवमा सहभागी हुन् नेपाल तथा भारतका विभिन्न स्थानबाट लाखौंको संख्यामा श्रद्धालुहरु जनकपुर पुग्ने गरेका छन्।