मेयरले घरमै पुगेर अपांगलाई दिए जागिर 

इटहरी- इटहरी–२ सहरभित्रको ग्रामीण क्षेत्र । जहाँ दुवै खुट्टा नचल्ने मानबहादुर भुजेल बस्छन् । शारीरिक अपांगता भएका भुजेलको जीवन निकै कष्टकर छ । उनको कम्मरमुनि चल्दैन । 

कतिसम्म भने उनी शौचालय जान पनि सक्दैनन् । इटहरीको जनता क्याम्पसमा मानविकी संकायमा स्नातक तेस्रो वर्ष अध्ययनरत उनी अपांगतामैत्री शौचालय नभएर दुःख पाएको बताउँछन् । 

‘मैले स्कुलमा पनि शौचालय प्रयोग गर्न पाइनँ’, १९ वर्षको उमेरमा मात्रै विद्यालय टेकेका भुजेल भन्छन्, ‘कलेजमा पनि दिसापिसाबले च्याप्यो कि कक्षा छाडेर घर पर्किहाल्छु ।’ उनी ८० वर्षीय बाबु र ७५ वर्षीय आमासँगै बस्दै आएका छन् । तर, इटहरीका मेयरले घरमै आएर जागिर दिएपछि अहिले भुजेल दंग छन् । उनी भन्छन्, ‘इटहरीका मेयरले घरमै आएर जागिर दिनुहुन्छ भन्ने कहिल्यै सोचिनँ । अब जीवनप्रति आशा पलाएको छ ।’ 

यसरी  मिल्यो भुजेललाई जागिर

पछिल्ला केही दिन इटहरीका मेयर द्वारिकलाल चौधरी गाउँ दौडाहामा छन् । उनी विभिन्न वडामा पुगेर त्यहाँका स्थानीयसँग विकास निर्माणसहित व्यक्तिगत छलफल गर्छन् । यसै क्रममा गत साताको एकाबिहानै चौधरी इटहरी–२ को देउराली चोकमा रहेको भुजेलको घरमा पुगे । 

भुजेललाई देखेर मेयर चौधरीले सोधे, ‘तपाईंलाई कस्तो छ ?’ भुजलले भने, ‘मेरो योग्यता र क्षमताले भ्याउने जागिर मिलाइदिए हुन्थ्यो ।’ भुजेलको  प्रस्तावमा चौधरी सकारात्मक भए । चौधरीले भने, ‘लु कागजपत्र लिएर उपमहानगरपालिका आउनुहोस्, तपाईंको जागिर पक्का भयो ।’