युभेन्ट्सको जितमा रोनाल्डोको गोल

एजेन्सी- शनिबार राति भएको इटालियन सिरी ‘ए’ अन्तर्गत शीर्ष स्थानको युभेन्ट्सले एसपीएएललाई पराजित गर्दै आफ्नो अपराजित यात्रालाई जारी राखेको छ । युभेन्टसले एसपीएएललाई २-० गोल अन्तरले पराजित गर्दै आफ्ना् अपराजित यात्रा जारी राखेको हो । 

युभेन्टसको जितमा क्रिस्टियानो रोनाल्डो र मारियो मान्जुकीचले १-१ गोल गरे । खेलको २८ औं मिनेटमा क्रिस्टियानो रोनाल्डोको गोल मार्फत युभेन्ट्सले खेलमा अग्रता लिएको थियो । 

उनले मिरालेम प्यानिचको फ्रिकिकलाई सदुपयोग गर्दै सहजै गोल गरेका थिए । पहिलो हाफमा १-० को अग्रता बनाएको युभेन्ट्सले दोस्रो हाफमा थप एक गोल गर्यो । खेलको ६० औं मिनेटमा टोलीको कप्तानी सम्हालिरहेका मान्जुकीचले अग्रता दोब्बर पारे । 

उनले गोलरक्षक गोमिसले बचाउन नसक्दा फर्केर आएको बलमा गोल गरेका थिए । ८१ औं मिनेटमा रोनाल्डोको प्रहर पोस्टभन्दा थोरै बाहिर गएको थियो । यस नतिजासँगै युभेन्ट्सको १३ खेलमा १२ जित र १ बराबरीसँगै ३७ अंक भएको छ । 

युभेन्ट्सले लिगको प्रत्यक खेलमा गोल गर्ने रेकर्डलाई कायम नै राखेको छ । दोस्रो स्थानमा रहेको नेपोलीको १२ खेलमा २८ अंक छ ।