एइबारसँग रियलको लज्जासपद हार

एजेन्सी- शनिबार भएका ला लिगा खेलमा रियल म्याड्रिड एइबारसँग फराकिलो अन्तरले पराजित भएको छ । घरेलु टोली एइबारसँग रियल ३-० को फराकिलो अन्तरे पराजित भएको हो । 

एइबारको जितका लागि गोन्जालो एस्केलेन्टे, सर्जि एन्रिच र किकेले समान एक एक गोल गरे । खेलको १६ औं मिनेटमा गोन्जालो एस्केलेन्टेको गोल मार्फत एइबारले अग्रता लिएको थियो । 

किकेले प्रहार गरेको बल रिबाउन्डमा एस्केलेन्टेले गोल गरेका थिए । उक्त गोलको निर्णयका लागि भिडियो असिस्टेन्ट रेफ्रीको प्रयोग गरिएको थियो । पहिलो हाफमा १-० को अग्रता बनाएको एइबारले दोस्रो हाफमा थप दुई गोल गर्यो । 

खेलको ५२ औं मिनेटमा मिडफिल्डर कुकुरेलाले दिएको क्रसलाई सहि सदुपयो गर्दै एन्रिचले गोल गरे । गोल खाएपछि प्रशिक्षक सोलारीले ओड्रीओजोलाको स्थानमा ड्यानी कर्भाजललाई उतारेका थिए । 

दोस्रो गोल खाएको पाँच मिनेट पछि रियलले तेस्रो गोल खायो । एइबारका लागि तेस्रो गोल किकेले गरे । उनले एन्रीचको मिस पासमा गोल गरेका थिए । रियलले गोल फर्काउने केहि मौका प्राप्त गरेपनि त्यसमा सफल हुन भने सकेन । 

यसअघि ला लिगाको इतिहासमा एइबारले रियलविरुद्ध ३ गोल गरेको थियो । तर शनिबार भएको खेलमा रियलले तीन गोल खाँदै जारी लिगको पाँचौ हार बेहोर्यो । रियलले एल क्लासिकोमा बार्सिलोनाविरुद्ध ५-१ को हार बेहोरेपछि जुलेन लोपेटेगुईलाई हटाउँदै सान्टियागो सोलारीलाई कार्यवाहक प्रशिक्षक नियुक्त गरेको थियो । 

सोलारीले कार्यवाहकका रुपमा त्यसपछिका ४ खेलमा जित दिलाएपछि रियालले उनलाई २०२१ सम्को लागि पूर्ण प्रशिक्षकको जिम्मेवारी सुम्पिएको थियो । पूर्ण प्रशिक्षकका रुपमा पहिलो खेलमा नै प्रशिक्षक सोलारीले हार बेहोरेका छन् ।