ला लिगा : आज बार्सिलोना, रियल र एटलेटिको भिड्दै

एजेन्सी- स्पेनिस ला लिगा अन्तर्गत शनिबार विभिन्न ४ खेलहरु हुँदैछन् । जसमा बार्सिलोना, एटलेटिको मड्रिड र रियल मड्रिड जस्ता ठुला टोलीले प्रतिस्पर्धा गर्दै छन् । 

ला लिगामा आजको मुख्य आर्कषकको रुपमा बार्सिलोना र एटलेटिको मड्रिड आमनेसामने हुँदैछन् । मड्रिडको खेल मैदानमा नेपाली समय अनुसार राति १:३० मा सुरु हुने खेलमा एटलेटिको बार्सिलोनाविरुद्ध जितविहिन यात्रालाई तोड्ने सुरमा हुनेछ ।

एटलेटिकोले लिगको पछिल्लो १६ खेलमा बार्सिलोनालाई हराउन सकेको छैन । यसअघि सन् २०१० फेब्रुअरीमा एटलेटिको विजयी रहेको थियो । एटलेटिकोले लिगअन्तर्गत घरेलु मैदानमा खेलेका पछिल्लो १६ मध्ये १२ खेलमा जित दर्ता गरेको छ । 

पछिल्लो खेलमा रातो कार्ड पाएपछि मिडफिल्डर इभान राकीटिच यस खेलका लागि उपलब्ध छैनन् । उनको स्थानमा आर्टुरो भिडालले सुरुवाती रोजाइमा खेल्ने सम्भावना रहेको छ । अंक तालिकामा बार्सिलोना एटलेटिकोभन्दा १ अंक अगाडी छ । 

यो खेल जित्ने टोलीले शीर्ष स्थानमा अग्रता बनाउनेछ । दुवै टोलीले पछिल्लो समय कमजोर टोलीविरुद्ध अंक गुमाएका थिए । लिगमा बार्सिलोनाले १२ खेलबाट २४ अंक जोडेको छ । एटलेटिकोको २३ अंक छ । 

ला लिगा अन्तर्गत नै आज रियल मड्रिडले इबरसँग खेल्दैछ । इबरको मैदानमा हुने खेल बेलुका ५:४५ मा सुरु हुनेछ । आज रियल इबरलाई हराएर अंक तालिकामा सुधार गर्न चाहन्छ । 

छैटौं स्थानको रियलले १२ खेलबाट २० अंक जोडेको छ । इबर १५ अंक जोडेर लिगको १३ औं स्थानमा छ । लिग अन्तर्गत नै आज भ्यालेन्सियाले रायो भालेकानो तथा हुएस्काले लेभान्टेसँग खेल्दैछ ।