नेयमार किन बार्सिलोना फर्किन चाहन्छन ? 

एजेन्सी- अन्तर्राष्ट्रिय सञ्चार माध्यममा ब्राजित तथा पेरिस सेन्ट जर्मन (पिएसजी)का स्टार खेलाडी नेयमार बार्सिलोना फर्किने चर्चा चलेको छ । 

फ्रान्स पुगेपछि उनी खुसी हुन नसकेको र ठूला सफलता हात पार्न नसकेपछि उनले पुनः बार्सिलोना फर्किन चाहेको खबर सार्वजनिक भएको छ । यतिबेला उनीमाथि बार्सिलोनाले पनि इच्छा देखाएको बताइएको छ । 

एक अन्तर्वार्तामा सेगुराले नेयमारले चाहे उनका लागि बार्सिलोनाको ढोका खुला रहने बताएपछि नेयमार पुनः बार्सिलोना फर्किने चर्चाले  बजार तताएको थियो । तर, यसका लागि बार्सिलोना स्वयंले नेयमार फिर्ता ल्याउन अफर गर्न नसक्ने सेगुराले बताएका छन् । 

नेयमारका लागि पिएसजीले रिलिज क्लज नराखेकाले नेयमार आफैंले पिएसजी छाड्ने निर्णय लिनुपर्ने र त्यो अवस्थामा बार्सिलोनाले ढोका खुला राख्ने बताएको मिडिया रिपोर्टमा उल्लेख छ । 

रिपोर्टमा यो पनि दाबी गरिएको छ कि, नेयमार पनि बार्सिलोना फर्किन इच्छुक छन् । अहिले नेयमारलाई क्याम्प नोउ फर्काउन बार्सिलोना नेयमार र उनका प्रतिनिधिसँग गोप्य सम्पर्कमा रहेको दाबी गरिएको छ ।

उनी गत बर्ष विश्वकीर्तिमानी २ सय २२ मिलियन युरोमा बार्सिलोना छोडेर पिएसजी पुगेका थिए । स्पेनिस पत्रिकामा प्रकाशित रिपोर्टअनुसार आगामी समर सिजनमा नेयमार बार्सिलोना फर्किने सम्भावनाको ढोका खुला भएको बताइएको छ ।