‘ए’ डिभिजन लिग : पुलिसविरुद्ध आर्मीको संघर्षपूर्ण जित

काठमाडौं- पल्सर सहिद स्मारक ‘ए’ डिaभिजन लिग अन्तर्गत तेस्रो चरणको खेलमा विभागिय टोली त्रिभुवन आर्मी क्लबले अर्को विभागिय टोली नेपाल पुलिस क्लबलाई पराजित गरेको छ । 

सातदोबाटोस्थित एन्फा कम्प्लेक्समा भएको खेलमा आर्मीले पुलिसलाई १-० को झिनो अन्तरले पराजित गरेको हो । आर्मीले खेलमा एक मात्र गोल पहिलो हाफमा गरेको थियो । 

आर्मीको जितका लागि खेलको एकमात्र निर्णायक गोल टेक बहादुर बुढाथोकीले गरेका थिए । नेपाल आर्मीको शान्ति मिसनबाट भर्खरै फर्किएका बुढाथोकीले एकमात्र निर्णायक गोल गरेका हुन् ।

उनले पहिलो हाफको ३० औं मिनेटमा टंक बस्नेतको पास गोल गर्दै आर्मीलाई अग्रता दिलाएका थिए । दुई विभागिय टोली आर्मी र पुलिसको खेल निकै नै प्रतिस्पर्धात्मक भएको थियो । 

दोस्रो हाफमा पुलिस खेलमा फर्कने कोसिस गरेपनि सफल भएनन् । पुलिसको केहि उत्कृष्ट आक्रमण आर्मीका किपर र डिफेन्सले बचाऊ गरेका थिए । दोस्रो हाफमा पुलिसका कप्तान सन्तोस लामाको उत्कृष्ट हेड प्रहार आर्मीका डिफेन्डरले गोललाइनबाट बचाएका थिए ।

लिगमा आर्मीको यो दोस्रो जित हो । पहिलो खेलमा एनआरटीसँग २-२ को बराबरी खेलेको आर्मीले दोस्रो खेलमा च्यासललाई १-० ले हराएको थियो । यता पुलिसले भने पहिलो खेलमा जावलाखेललाई १-० ले हराएपनि दोस्रो खेलमा मछिन्द्रविरुद्ध गोलारहित बराबरी खेलेको थियो ।