हुसेन हत्या प्रकरण : अवरुद्ध इटहरी–विराटनगर सडक खुल्यो

इटहरी-दुई बन्दुकधारीबाट मारिएका सुनसरीका फिदा हुसेनको हत्यारा यथाशीघ्र पत्ता लगाई कारबाही प्रक्रिया अघि बढाउन प्रहरी प्रशासन सहमत भएपछि इटहरी–विराटनगर सडक बिहीबार अपराह्नदेखि सञ्चालनमा आएको छ । मृतक हुसेनका एक छोरालाई नेपाल विद्युत् प्राधिकरणमा जागिर लगाइदिन, हुसेनलाई सहिद घोषणा गर्न र क्षतिपूर्ति उपलब्ध गराउन प्रशासन सहमत भएपछि अवरुद्ध सडक सञ्चालनमा आएको हो ।

गृहमन्त्रीको राजीनामाबाहेक अरू माग पूरा गर्न सरकार पक्ष सहमत भएपछि फिदाको शव उठाउन सहमत भएको उनको परिवारजनले बताएका छन् । वार्तामा सुनसरीका प्रमुख जिल्ला अधिकारी प्रेमप्रकाश उप्रेती र प्रहरी प्रमुख एसपी राजन अधिकारी तथा मृतकका आफन्त सहभागी थिए । बुधबार बिहान श्रीमतीसँगै मर्निङ वाकमा रहँदा हुसेनलाइ दुहरी नगरपालीका–९ मा छाताबेलीको नहरको पुल नजिक गोली हानिएको थियो । 

दुहबीको जयबाबा इट्टा उद्योगका व्यवस्थापक हुसेनलाई गोली लागेपछि उपचारका क्रममा विराटनगरको एक अस्पताल लाँदै गर्दा मृत्यु भएको थियो। हुसेन दुहबीको विद्युत प्राधिकरणका एक प्राविधिक कर्मचारीको रुपमा पनि कार्यरत थिए । मुस्लिम धर्मवालम्बीहरुको पवित्र महोम्मद डेका दिन गरिएको हुसेन हत्याको विरोधमा प्रदर्शन भएका थिए। 

प्रदर्शनकारीहरुले बुधबार बिहान ८ बजेटदेखि मुख्य दुहबी बजार र बजारबाटै जाने राजमार्ग अवरुद्ध पारेका थिए । धरान–इटहरी–विराटनगर जस्ता प्रदेश १ का मुख्य तीन सहर जोड्ने राजमार्गको दुहबी क्षेत्रमा सडक अबरुद्ध भएपछि पूर्वपश्चिम राजमार्गको विराटचोक हुँदै सवारीलाइ डाइभर्ट गर्नुपरेको थियो ।