क्यामरुनमाथि ब्राजिलको जित, नेयमार घाइते

एजेन्सी- मंगलबार राती भएको अन्तर्राष्ट्रिय मैत्रीपूर्ण खेल अन्तर्गत ब्राजिलले क्यामरुनलाई १-० ले पराजित गरेको छ । तर, उक्त खेलमा ब्राजिलका कप्तान तथा फरवार्ड नेयमार भने चोट ग्रस्त भएका छन् ।  

उनी खेलको आठौं मिनेटमा नै तिघ्राको चोटबाट पिडित हुदै मैदान छाड्न बाध्य भएका थिए । उनको स्थानमा एभरटनका रिचार्लीसन मैदान प्रवेश गरे भने मार्किन्होसले कप्तानको जिम्मेवारी लिएका थिए । 

ब्राजिलका लागि खेलको एक मात्र निर्णायक गोल वैकल्पिक खेलाडी रिचार्लीसनले गरे । उनले पहिलो हाफको अन्तिम समयमा गरेको गोल नै खेलको निर्णायक गोल बन्यो । ब्राजिलले जित दर्ता गरेपनि नेयमारको चोट नै खेलको मुख्य पाटो बन्यो । 

ब्राजिलका टिम डाक्टर रोद्रिगो लास्मारले प्रारम्भिक परिक्षणले उनको चोट गम्भीर नरहेको बताएका छन् । ‘उनको दायाँ तिघ्रामा केहि समस्या देखिएको छ । उनले कठिनाइ महसुस गर्ने बितिकै हामीले ड्रेसिङ रुममा केहि परिक्षण गर्यौं । प्रारम्भिक रुपमा हेर्दा गम्भीर छैन तर केहि स्क्यान गरेपछि विस्तृत थाहा हुनेछ,’ उनले भने ।

ब्राजिलले चार दिन अघि उरुग्वेलाई १-० ले हराउँदा नेयमारले गोल गरेका थिए । स खेलमा उनले नै पेनाल्टी गोल गरेका थिए । नेयमारको चोट गम्भीर भएको अवस्थामा फ्रान्सेली क्लब पीएसजीलाई ठूलो घाटा हुनेछ । पीएसजीले अर्को साता च्याम्पियन्स लिगमा लिभरपुलसँग खेल्दैछ । लिगमा भने यसै साता पीएसजीले टुलुजको सामना गर्नेछ ।