रत्‍नपार्कमा दिउँसै कालोपत्रे, जामको सास्ती

काठमाडौं- राजधानीमा ट्राफिक जाम हुनु कुनै नौलो कुरा होइन्। सडक प्रयोगकर्ताहरुले हरेक दिन कुनै न कुनै प्रकारको जामको सामना गर्नुपर्ने हुन्छ। 

कहिले भिभिआर्इपी सवारीले त, कहिले सवारी दुर्घटना, कहिले विभिन्न खाले जुलुस र प्रदर्शन अनि कहिले फितलो ट्राफिक व्यवस्थापनका कारण काठमाडौंमा जामको सकस हुन्छ। 

काठमाडौंको व्यस्त सडक रत्‍नपार्कमा मंगलबार दिउँसो अचम्‍मको जाम भयो। एक बजेदेखि करिब तीन बजेसम्म सडकमा जाम भयो। रत्नपार्क-रानीपोखरी सडक खण्डमा दिउँसै कालोपत्रे बिछ्याउने काम भइरहेकोले उक्त जाम भएको हो।

सामान्यतया व्यस्त सडकमा रातिको समयमा मात्रै सडक मर्मत र कालोपत्रे बिछ्याउने काम गरिन्छ। तर, सडक विभाग र अन्य सरोकारवाला निकायको व्यवस्थापकिय कमजोरी र फितलो समन्वयका कारण सर्वसाधारण घण्टौं जामको सास्ती सामना गर्नुपरेको छ।