कांग्रेसको निर्णय नेविसंघले नमान्ने!

काठमाडौं–नेपाली कांग्रेसले नेपाल विद्यार्थी संघको वर्तमान कार्यसमितिको म्याद दुई महिना थप्ने तयारी गरेको छ । पार्टी कार्यालय सानेपामा रहेका केन्द्रीय सदस्य प्रदीप पौडेलले भने, ‘नेतृत्वले नेविसंघको म्याद दुई महिना थप्ने तयारी गरेको छ । अहिले अनौपचारिक छलफल पनि जारी छ । शीर्ष नेताहरुबीच वर्तमान समितिको म्याद दुई महिना थप्ने, विद्यार्थीको माग अनुसार ६ महिना पुर्‍याउने वा नयाँ तदर्थ समिति बनाउने विषयमा छलफल भइरहेको छ ।’

तर, अहिलेको कार्यसमितिमा भएका अध्यक्ष नेनसिंह महरसहित कुन्दन काफ्ले लगायतले दुई महिनामात्र म्याद थप भए निर्धारित काम गर्न नसकिने भन्दै राजीनामा दिने मनस्थिति बनाएको बुझिएको छ ।

आइतबार भएको छलफलका क्रममा सहमहामन्त्री प्रकाशशरण महत नेतृत्वको निर्देशक समितिले विधानका विषयमा भने सहमति जुटाएर नेतृत्वलाई बुझाएको छ । नेविसंघको ३२ वर्षे उमेरहद हद हटाउनुपर्ने प्रस्तावलाई खारेज गर्ने निर्णय पनि गरेको छ । यो निर्णयसँगै अब नेविसंघमा ३२ वर्षमा माथिको व्यक्ति नेतृत्वतहमा नपुग्ने भएको छ ।