पार्टी कार्यालयमै सभापति देउवालाई नेविसंघले बाटो छेक्यो 

काठमाडौं–कांग्रेस भ्रातृ संगठन नेपाल विद्यार्थी संघको महाधिवेशन र कार्य समितिको कार्यकाल थपका विषयमा छलफल गर्न बोलाइएको केन्द्रीय समिति बैठकमा भाग लिन पार्टी कार्यालय सानेपा पुगेका सभापति शेरबहादुर देउवासहितका केन्द्रीय सदस्यहरूलाई विद्यार्थी नेताले ढोकामै रोकेका छन् । पार्टीका नेता रामचन्द्र पौडेल र कृष्णप्रसाद सिटौला निकट विद्यार्थी नेताले पार्टी नेतृत्वलाई खबरदारी गरेका हुन् । 

सभापति देउवालाई रोक्नेमा संघका पूर्वकेन्द्रीय सदस्य तथा पूर्वपदाधिकारीहरू छन् । उनीहरूले सभापतिसमक्ष ‘टिके प्रथा चाहिँदैन’, ‘संघको वर्तमान कार्यसमितिको म्याद थप गर्ने काम नहोस्’ भन्दै खबरदारी गरेका छन् । 

सभापति देउवा मुख्यालयमा प्रवेश गर्नेबित्तिकै दीपक भट्टराई, मोती भण्डारी, अनिल खनाललगायतले टिकेप्रथाको विरोध गरेका छन् । यस्तै सुशील भट्ट, निरञ्जन थापालगायत संघको वर्तमान कार्यसमितिमा रहेका नेताले महाधिवेशनअघि संघलाई विघटन नगर्न चेतावनी दिएका छन् । वर्तमान कार्य समितिलाई नै तदर्थ समिति बनाएर महाधिवेशन मिति तोक्नुपर्ने माग उनीहरुको छ । भट्ट र थापा नेता कृष्ण सिटौला निकट मानिन्छन् भने भट्टराई, भण्डारी, खनाल पौडेल निकट मानिन्छन् । 



विद्यार्थी नेताहरूले उपसभापति विमलेन्द्र निधि, वरिष्ठ नेता रामचन्द्र पौडेल, महामन्त्री शशांक कोइराला, पूर्वमहामन्त्री कृष्ण सिटौला, केन्द्रीय सदस्य गगन थापालाई पनि रोकेर नेविसंघमा टिके प्रथा अन्त्य गर्न माग गरेका थिए ।

नेपाली कांग्रेसका एक केन्द्रीय सदस्यले संघको वर्तमान समितिलाई तदर्थ समितिमा परिणत गरी महाधिवेशनमा जानुपर्ने बताए । उनले भने, ‘यही समितिलाई काम गर्न दिऊँ।  विधान बनाउनै बाँकी छ । विजय गच्छदार पक्षका मान्छेलाई समेट्न बाँकी छ ।’ स्ववियु चुनावपछि मात्र संघको महाधिवेशन गर्नुपर्ने उनले बताए । स्ववियु चुनाव फागुन अन्तिम वा चैत पहिलो साता हुन्छ ।
पार्टी नेता रामचन्द्र पौडेल भने आफू पक्षका नेताको संयोजकत्वमा तदर्थ समिति बनाउनुपर्ने पक्षमा रहेको ती केन्द्रीय सदस्यले जानकारी दिए ।

नैनसिंह महर नेतृत्वको नेपाल विद्यार्थी संघको दुईवर्षे कार्यकाल गत भदौ २ मा सकिएको थियो। पार्टीले तीन महिना कार्यकाल थप गरी ३ मंसिरसम्मको समयसीमा पुर्‍याएको थियो । संघको विधानअनुसार अब कार्यसमितिको म्याद थप्न मिल्दैन । तर विजयकुमार गच्छदार नेतृत्वको फोरम लोकतन्त्र कांग्रेसमा विलय भएपछिको अवस्थालाई आधार मानेर र पार्टीले विशेष राजनीतिक निर्णय गरी म्याद थप्न सक्नेछ । विद्यार्थी नेताहरू संघको विधान टुंगोमा पुर्‍याई तत्काल महाधिवेशनमार्फत नयाँ नेतृत्व चयन गर्नुपर्ने पक्षमा छन् ।