हत्या मुद्दाका साक्षीकै हत्या

जनकपुरधाम–धनुषामा हत्यासम्बन्धी मुद्दाका एक साक्षीको हत्या भएको छ । विदेह नगरपालिका–५ मुडिबा बस्ने ६७ वर्षीय मानैर ठाकुरको हत्या भएको हो ।

बुधबार साँझदेखि वेपत्ता भएका ठाकुरको शव बिहीबार बिहान गाउँकै सामुदायिक विद्यालय पछाडीको खाल्डोमा फेला परेको छ । ठाकुरको आँखा र कनचटमा धारिलो हतियार प्रहार भएको देखिएको प्रहरीले जनाएको छ । 

जिल्ला अदालत धनुषामा शुक्रबार गाउँकै एक महिलाको हत्यासम्बन्धी मुद्दामा ठाकुरलाई बकपत्रको लागि बोलाइएको थियो। अदालतमा बकपत्र हुनु एक दिनअघि ठाकुरको हत्या भएको हो ।

केही महिनाअघि स्थानीय लक्ष्मी मण्डलको श्रीमती हत्या घटनामा अदालतमा बकपत्र दिने तयारीमा रहेको बेला ठाकुरको हत्या भएको धनुषाका एसपी गोविन्द थपलियाले जानकारी दिए ।

मण्डलको श्रीमती हत्याका अभियुक्त भनिएका बहादुर मण्डल र ठाकुरबीच गवाहीको विषय लिएर गत आइतबार भनाभनसमेत भएको स्थानीयलाई उदृत गर्दै प्रहरीले जनाएको छ । ठाकुरको हत्याबारे थप अनुसन्धान भइरहेको प्रहरी उपरीक्षक थपलियाले बताए ।