नगरकोटका होटल व्यवसायी माइतीघरमा धर्नामा

काठमाडौं- स्थानीय तहले नगरकोट घुम्न जाने विदेशी पर्यटकसँग जथाभाबी कर असुलेको विरोधमा नगरकोटका होटल व्यवसायी बिहीबार काठमाडौंको माइतीघरमा धर्नामा बसेका छन्। दोहोरो करविरुद्ध नगरकोटका होटल व्यवसायी पछिल्लो एक महिनादेखि आन्दोलनमा छन्।

नगरकोट आउने विदेशी पर्यटकसँग चाँगुनारायण नगरपालिका र मण्डनदेउपुर नगरपालिकाले छुट्टाछट्टै कर असुल्न थालेपछि व्यवसायी आन्दोलनमा उत्रिएका हुन्। नगरकोट राजधानी नजिक रहेको पर्यटकीय स्थल हो। मनोरम हिमाली दृश्यावलोकन, सूर्योदयको दृश्यका साथै शान्त वातावरणले गर्दा स्वदेशी तथा विदेशी पर्यटक त्यहाँ पुग्न चाहन्छन्। विदेशी पर्यटकसँग चाँगुनारायण नगरपालिकाले प्रतिव्यक्ति तीन सय रुपैयाँ र मण्डनदेउपुर नगरपालिकाले तीन सय ३९ रुपैयाँ असुल्दै आएका छन्।

दोहोरो कर लिए पनि ती नगरपालिकाले नगरकोटको भौतिक संरचनाको विकासमा चासो दिएका छैनन्। भत्तलपुरको सल्लाघारीदेखि नगरकोटसम्मको करिब ३० किलोमिटर सडक जीर्ण छ भने नगरकोटमा खानेपानी अभाव छ। 

सरकारले सन् २०२० लाई पर्यटक वर्षका रूपमा मनाउने तयारी गरेको छ। यस क्रममा २० लाख विदेशी पर्यटक नेपाल भित्र्याउने योजना छ। स्थानीय तहले पर्यटकसँग जथाभाबी कर असुल्दा पर्यटकमा नकारात्मक सन्देश जाने भन्दै सरोकारवाला निकायले चिन्ता व्यक्त गरेका छन्।