भारतको राजदुतमा आचार्यको नाम सिफारिस

काठमाडाैं- सरकारले भारतसहित विभिन्न मुलुकमा राजदुत नियुीक्तका लागि सिफारिस गरेको छ । 

लामो समयपछि आइतबार राती बसेको मन्त्रिपरिषद् बैठकले भारतका लागि नेपाली राजदूतमा निलाम्बर आचार्यलाई सिफारिस गरेको छ। साढे २ दशक अघि नै श्रीलंकाको राजदुत बनिसकेका आचार्य नेपाल भारत प्रबुद्ध समूहका सदस्यसमेत हुन्। 

भारतका लागि नेपालका तत्कालीन राजदूत दीपकुमार उपाध्यायले प्रतिनिधि र प्रदेशसभा निर्वाचनअघि राजीनामा दिएपछि सो पद रिक्त थियो। यसपछि सरकारले पूर्वप्रमुख निर्वाचन आयुक्त नीलकण्ठ उप्रेतीलाई भारतका लागि राजदूतमा सिफारिस गरेको थियो । तर, उक्त सिफारिस विवादमा परेपछि सरकारले खारेज गरेको थियो । 

यस्तै सरकारले मलेसियाको राजदूतमा उदयराज पाण्डे र संयुक्त अरब इमिरेट्स (युएई) को राजदूतमा कृष्ण ढकालको नाम सिफारिस गरेको छ। यस्तै संयुक्त राष्ट्रसंघको जेनेभास्थित नियोग प्रमुखमा दीपक धिताललाई नै निरन्तरता दिने निर्णय मन्त्रिपरिषद्ले गरेको छ।

सरकारले सिफारिस गरेको नाममा सम्बन्धित मुलुकबाट एग्रिमो आएपछि राजदूत नियुक्ति प्रक्रिया संसदीय सुनुवाई प्रक्रियाबाट अघि बढ्छ ।