खेलाडीको तिहार : कोही उल्लासमा, कोही मैदानमा

काठमाडौं- उज्यालो चाड तिहारले हिन्दु धर्मको धेरै आयाम बोकेको छ । पाँच दिने चाडमा पशुपक्षी, देवीदेवतादेखि मानवसम्म पुजिन्छन् । तिहार बत्ती, गीतसंगीत, रङ, फूलजस्ता सुन्दर वस्तुहरू भावनासँग जोडिने पर्व हो । यमपञ्चकको पाँचाैं दिन भाइतिहार पर्छ । यस दिन दिदीबहिनीले दाजुभाइको पूजा गरेर निधारमा सप्तरंगी टीका तथा माला लगाइदिने चलन छ । 

यो पर्व दाजुभाइ तथा दिदीबहिनीबीच भेटघाट हुने एवं सम्बन्ध प्रगाढ बनाउने शुभ अवसर पनि मानिन्छ । यस वर्ष महिला राष्ट्रिय फुटबल टोलीका खेलाडीलाई भने त्यो शुभ अवसर छैन । यतिबेला नेपाली महिला राष्ट्रिय फुटबल टोली पहिलोपटक ओलम्पिक छनोटमा भाग लिन म्यानमारमा छ । कहिलेकाहीं खेलाडीले चाडपर्व मुखैमा आएर पनि मनाउन नपाएका व्यथा छन् । घरपरिवार छाडेर देशको प्रतिनिधित्व गर्दै विदेशमा खेल्न जानु खेलाडीका लागि नौलो भने होइन । 

वि.सं. २०७३ सालको तिहारमा सारा नेपाल लक्ष्मीपूजामा व्यस्त हुँदा नेपाली राष्ट्रिय फुटबल टोली भने विमानस्थलमा मलेसिया प्रस्थान गर्ने तयारीमा थियो । त्यतिबेला मलेसियामा आयोजित एएफसी सोलिडारिटी कपमा सहभागी हुन नेपाली टोली त्यसतर्फ लागेको थियो । 



टोली मलेसिया पुगेको भोलिपल्ट भाइटीका थियो । मलेसिया पुगेका ३२ सदस्यीय नेपाली टोलीको निधार खाली नहोस् भनेर टोलीका गोलरक्षक विशाल श्रेष्ठकी दिदी विद्याले टोली जानुअघि योजना बनाइसकेकी रहिछन् । टोली नेपालमा छँदै उनले उपकप्तान विराज महर्जनको हातमा टीका सामग्रीसँगै कोसेली पनि मलेसिया पठाइन् । यो कुरा विशाललाई भने पत्तो थिएन ।

टीकाको दिन टोलीका सम्पूर्ण सदस्य नियमित कार्यतालिकाअनुसार ब्रेकफास्टमा सरिक भए । त्यस समय विशालको टेबलमा कोसेलीको पोको राखिएको थियो । विशाल त्यो देखेर आश्चर्यमा परे । जब विराजले उनलाई दिदीले नेपालदेखि भाइटीकाको कोसेली पठाएको खुलासा गरे, विशाल भावुक भए । त्यसपछि दिदीबहिनीको हातको सप्तरंगी टिका सम्झँदै उदास मन लिएर मलेसिया पुगेको नेपाली फुटबल टोली खुसी भयो ।  नेपालीको मनलाई पुनः झिलिमिली पार्दै तिहार मनाए । 
 

यस वर्ष नेपालमा हामीले तिहार मनाइरहँदा महिला राष्ट्रिय फुटबल टोली प्रतिस्पर्धाको मैदानमा हुनेछ । महिला राष्ट्रिय फुटबल खेलाडीले भने दाजुभाइको निधारको सप्तरंगी टीका र गलामा रहेको सयपत्री फूलको माला म्यानमारबाटै सम्झिनेछन् । 

नेपाली टोली केही साताअघि मैत्रीपूर्ण खेल खेल्न चीन पुगेको थियो । टोली चीनमा तीन मैत्रीपूर्ण खेल खेलेर कात्तिक १६ गते म्यानमार पुगेको छ । 

नेपाल सम्मिलित ओलम्पिक छनोटको समूहमा भारत, म्यानमार र बंगलादेश रहेका छन् । नेपालले ८ नोभेम्बरमा भारतसँग पहिलो खेल खेल्ने छ भने ११ नोभेम्बरमा म्यानमार र १३ नोभेम्बरमा बंगलादेशसँग प्रतिस्पर्धा गर्दैछ । हरि खड्काको मुख्य प्रशिक्षणमा रहेको नेपाली टोलीको अर्का प्रशिक्षक मृगेन्द्र मिश्र छन् । यस्तै टिम वयस्थापनमा हिराचन थकाली रहेका छन् । 

पछिल्लोपटक महिला टेबलटेनिसमा एकछत्र राज गर्दै आएकी नविता श्रेष्ठ तिहारको तीव्र पर्खाइमा छिन् । घर सफाइ, लक्ष्मीपूजा, देउसीभैलो र भाइटीकाका कारण आफूलाई तिहार निकै मन पर्ने उनले बताइन् । उनले नेपाल संवत्को नयाँ वर्ष ११३९ मा सहभागी हुने योजना बनाएकी छिन् । 



नविताका एक भाइ छन् । भाइटीकामा उनका परिवारका सबै दिदीबहिनी र दाजुभाइ एकै स्थानमा भेला हुन्छन् । सधैं फरकफरक ठाउँमा तिहार मनाउँदै आएकी नविता यस वर्ष पनि यसै गरी तिहार मनाउने योजनामा छिन् । ‘हामी दिदीबहिनी मिलेर तिहार फरकफरक स्थानमा मनाउँछौं । यस वर्ष हामी दिदीको घर फर्पिङमा तिहार मनाउने योजनामा छौं,’ नविताले भनिन् ।

तेक्वान्दो खेलाडी निशा रावल यस वर्षको तिहार केही फरक बनाउने तयारीमा छिन् । तिहारमा साथीभाइसँग भेटघाट गर्ने र घुम्नजाने उनको योजना छ । तर, कुन ठाउँमा जाने भन्ने अहिलेसम्म टुंगो लगाएकी छैनन् । ‘यस वर्षको तिहार बिदामा साथीहरुसँग घुम्न जाने योजनामा छु । तर कुन ठाउँ जाने अहिलेसम्म टुंगो लागेको छैन,’ निशाले भनिन् । 

दुई दिदी–बहिनीमध्येकी जेठी छोरी निशाले भाइलाई तिहारमा घडी उपहार दिने बताइन् । तिहारका बेला काठमाडौं उपत्यकाका विभिन्न मठ–मन्दिरको भ्रमण गर्ने योजना रहेको उनले बताइन् । ‘सबै सँगै हुने भएकाले कतै नजिक घुम्न जाने योजना छ । यसरी आफ्नो मान्छेसँगै रमाइलो गर्दा जतिको मजा अरू केही हुन्न । परिवारका सबै सदस्य एकै ठाउँमा जम्मा हुँदा छुट्टै उल्लास हुन्छ,’ उनले भनिन् ।