‘ओली सरकार ज्ञानेन्द्र पथमा हिंडेको छ’

जनकपुरधाम-नेपाली कांग्रेसका केन्द्रीय सदस्य तथा प्रमुख सचेतक बालकृष्ण खाँणले केपी ओली नेतृत्वको वर्तमान सरकार पूर्वराजा ज्ञानेन्द्र पथमा हिंडेको आरोप लगाएका छन् ।

खाँणले दुई तिहाइ बहुमतको दम्भ देखाएर सरकार संविधान र लोकतन्त्रविरुद्धको गतिविधि गर्दै अगाडी बढेको भन्दै जनता अहिले पूर्वराजा ज्ञानेन्द्रको शासन अनुभूति गरिरहेको बताए ।

‘नेकपाको सरकार बहुमतको दम्भमा मातेर लोकतन्त्रविरुद्धको गतिविधि गर्दै अगाडी बढेको छ,’ बुधबार जनकपुरमा पत्रकार भेटघाटमा खाँणले भने,‘कम्युनिस्टहरुको सर्वसत्तावादी र केन्द्रीकृत सोचका कारण संघीयता नै धरापमा पर्ने खतरा बढेको छ ।’

नेपालको विविधतालाई सम्बोधन लोकतन्त्रले मात्र गर्न सक्ने भएपनि अहिलेको कम्युनिस्ट सरकार विगतको पुरानो पञ्चायती शैलीमा अगाढी बढिरहेको खाँणले बताए ।

खाँणले अत्याधिक करवृद्धिका कारण जनताको क्रयशक्ति हस भएको भन्दै संघीयताप्रति वितृष्णा फैलाउन सरकारले यस्तो नीति अपनाएको आरोप लगाए । 

लोकतान्त्रिक शक्तिले मात्र संघीयतालाई अगाडी बढाउन सक्ने भन्दै उनले कम्युनिस्टहरुको विचारधारा नै संघीयता विरोधी रहेको बताए । प्रदेश सरकारहरुलाई केन्द्र सरकारले कुनै अधिकार र अख्तियारी नदिएकोले संघीयता कार्यान्वयन संकटमा परेको उनको भनाइ थियो ।

‘नागरिकको आधारभूत आवश्यक्ता पुरा गर्नसमेत सरकार असफल भएको छ,’ खाँणले भने,‘मुलुकमा हत्या हिंसा बढेको छ, दोषीलाई सरकारले कारबाहीको दायरामा ल्याउन सकेको छैन् । यस्तै गतिविधि रहे सरकार पाँच वर्ष चल्नेबाला छैन् ।’

सरकार सञ्चालन गर्न बहुमत रहेकैबेला अन्य दललाई सरकारमा सहभागी गराएर दुई तिहाई पु¥याएपनि संविधान संशोधनको कुरा गर्न नसक्नु दुखद रहेको उनको भनाइ थियो ।

सर्वहाराको नाउँमा राजनीति गर्दै आइरहेको कम्युनिस्टहरु आगामी १० वर्षभित्र संसारबाट समाप्त भएर जाने दाबी गदैै खाँणले कांग्रेस कमजोर भए राष्ट्रियता र लोकतन्त्र कमजोर हुने बताए ।