पदको दम्भ देखाउँदै मन्त्रीको अस्पतालमा कुरुवामाथि कुटपिट, बच्चाको मृत्यु

जनकपुरधाम-स्वास्थ्य तथा जनसंख्या राज्यमन्त्री डा.सुरेन्द्र यादवले जनकपुरमा सञ्चालन गरेको जानकी हेल्थ केयर एण्ड सिरर्च सेन्टरका कर्मचारीहरुले बिरामीका कुरुवाहरुलाई निर्घात कुटपिट गरेका छन् ।

जानकी हेल्थ केयर सेन्टरमा प्रसुतिका लागि पुगेकी एक महिलाको कुरुवाहरुलाई त्यहाँका कर्मचारीहरुले कुटपिट गरेका हुन् । मंगलबार राति प्रसुतिका लागि जानकी हेल्थ केयर सेन्टर पुगेकी महोत्तरी बर्दिवास नगरपालिकाकी सृजना महतोकी काका किशोरी महतोलाई कुटपिट गरी अस्पतालका कर्मचारीहरुले आँखा फुटाई दिएका छन् । यसैगरी कर्मचारीहरुको कुटपिटबाट अन्य तीनजनालाई चोटपटक लागेको छ ।

आँखामा गम्भीर चोट लागेको सृजनाकी काका किशोरीलाई उपचारको लागि बाहिर रेफर गरिएको छ । कुटपिटबाट सृजनाकी अर्का काका हरि महतो, भाइ मोहन महतो र नन्द सुनिता महतोलाई चोटपटक लागेको छ ।

प्रसुतिका लागि २६ वर्षीय सृजना मंगलबार बर्दिवासस्थित एक अस्पतालमा भर्ना भएकी थिइन् । बच्चाको मुटुको गति कम रहेको भन्दै बर्दिवास अस्पतालले सिर्जनालाई जनकपुर रेफर गर्‍यो । उनी जानकी हेल्थ केयर सेन्टरमा मंगलबार राति ८ बजे भर्ना भइन् । सिर्जना भर्ना भएको समय प्रसुतिसम्बन्धी चिकित्सक अस्पतालमा थिएनन् ।

र्सिजनासँगै पुगेका कुरुवाहरुले डाक्टर बोलाउन नर्स तथा अस्पताल प्रशासनलाई पटक पटक आग्रह गरे । र, उनीहरुले ५ मिनेटमै डाक्टर पुग्ने आश्वासन समेत दिएको थियो । 

तर राति ९ बजेसम्म पनि डाक्टर नआएपछि बच्चाको घाँटी पेटमै अडकेर मृत्यु भएको सृजनाकी बुबा उमेश महतोले बताए । डाक्टर बोलाउन पटक पटक आग्रह गरेपनि अस्पताल प्रशासनले बास्ता नगरेकोले बच्चाको मृत्यु भएको उमेशको भनाइ छ ।

बच्चाको मृत्युपछि सृजनाको भाइ मोहनले डाक्टर नआउने र यहाँ प्रसुती सम्भव नहुने कुरा शुरुमै किन नभनेको भन्दै आक्रोश पोखेपछि विवाद भएको उमेशले जनाएका छन् ।

विवाद भएपछि अस्पतालका कर्मचारीका साथै बाहिरबाट मानिस बोलाएर मन्त्रीको अस्पताल रहेको भन्दै २०÷२५ जनाको समूहमा रहेका व्यक्तिहरुले आफ्नो छोरा, भाइ र सृजनाकी नन्दलाई कुटपिट गरेको उनले जनाए ।

‘पिट नपिट के गर्छ, आफ्नै मन्त्रीको अस्पताल हो भन्दै उनीहरुले कुटपिट गरे,’ उमेशले भने । विवाद भएपछि आफूहरुले प्रहरीलाई फोन गरेको र प्रहरीले एक कर्मचारीका साथै छोरा मोहनलाई समेत नियन्त्रणमा लिएको उनको भनाइ छ । शक्तिको आड लिएर आफूहरु माथि अन्याय भएको भन्दै न्यायका लागि गुहार गरेका छन् ।