भाइ मसलामा महंगी मार

काठमाडौं- दिदीबहिनीले दाजुभाइलाई भाइटीका लगाएर दिने ‘भाइमसला’ निकै चर्को मूल्यमा खरिद भइरहेको छ । मसलाको भाउ गत वर्षको तुलनामा दुई गुणा बढी मूल्य तिरेर किन्नुपरेको गुनासो उपभोक्ताले गरेका छन् । 

कीर्तिपुरस्थित एक खुद्रा पसलमा भेटिएकी मनीषा महर्जनले मसलाको भाउ अचाक्ली बढेको बताइन् । उनी मखना र पेस्ताको मूल्य सुनेर चकित भएकी थिइन् । काजु, बदाम र छोकडाको मूल्यसमेत बढेको छ । पसलका खुद्रा व्यापारीले पनि मसलाको मूल्य गत वर्षको तुलनामा दुई गुणाभन्दा बढी बढेको स्वीकारे । 

गत वर्ष प्रतिकेजी चार सय रुपैयाँमा पाइने मखना अहिले पाँच सय बढेर नौ सय रुपैयाँ पुगेको छ । एक महिनासम्म एक हजार ३५० रुपैयाँमा बिक्री भएको पेस्ता १७ सय ५० रुपैयाँमा बिक्री भइरहेको छ । गत वर्ष प्रतिकेजी १६ सय रुपैयाँ रहेको काजु अहिले १६ सय ५० पुगेको छ । चार सय रुपैयाँको किसमिस ६ सय र १५० मा पाइने छोकडा १ सय ८० रुपैयाँसम्म पुगेको खुद्रा व्यापारी बताउँछन् ।

काठमाडौं असनमा भेटिएकी लक्ष्मी श्रेष्ठले व्यवसायीले चर्को मूल्यमा मसला बिक्री गरिरहेको गुनासो गरिन् । ‘मूल्य त असाध्यै चर्को छ, साथै प्याक गरिएको मसलामा सबै मसला पाइँदैन,’ उनले भनिन् ‘परिमाणसमेत थोरै रहेछ ।’ 

व्यवसायीले प्रतिप्याकेट मसलाको ५० रुपैयाँदेखि पाँच सयसम्म बिक्री गरिरहेका छन् । असनका खुद्रा व्यापारी भाइमान महर्जनले यसपटकको तिहारमा काजु, पेस्ता, किसमिस, बदाम, ओखरलगायतको मूल्य न्यूनतम दुई सय रुपैयाँसम्म बढेको बताए ।

असनमा मसलाको प्याकेट बिक्री गरिरहेका अच्युत पराजुलीले विगतको भन्दा एक प्याकेट मसलामा २० रुपैयाँसम्म बढेको जानकारी दिए । प्याकिङ गर्ने थोक व्यवसायीबाटै मूल्य बढेको उनको भनाइ छ । 

नेपाल खुद्रा व्यापार संघका निवर्तमान अध्यक्ष पवित्र बज्रचार्यले भने बजारमा हल्ला भएअनुसार ‘भाइमसला’ को मूल्य नबढेको दाबी गरे । ‘बढीमा २०/२५ प्रतिशत बढेको छ,’ उनले भने, ‘तर बाहिर हल्ला भएअनुसारको बढेको होइन ।’ केही मसलाको मूल्य घटेको उनको भनाइ छ ।

उनका अनुसार पेस्ता बाहिरबाट आयात गर्दा व्यापारीले नै महँगोमा खरिद गरेका हुन्छन् भने मखना तिहारबाहेक अन्य समयमा नबिक्ने भएकाले महँगो भएको हो ।
 
नेपाली बजारमा तिहारमा करिब चार अर्ब रुपैयाँ बराबरको मसला भित्रिने गरेको छ । व्यापार तथा निकासी प्रवद्र्धन केन्द्रको तथ्यांकअनुसार चालु आर्थिक वर्षको तीन महिना अर्थात् असोज मसान्तसम्म तीन अर्ब ९ करोड रुपैयाँ बराबरको १४ हजार ५५२ टन मसला भित्रिएको छ । यसमा कात्तिकमा भिभिएको मसला समावेश छैन । कात्तिकको तीन साता बित्दासम्मको हिसाब गर्ने हो भने मसला आयात चार अर्ब रुपैयाँको हाराहारीमा पुग्ने केन्द्रका वरिष्ठ अधिकृत कृष्ण बजगाईंले बताए ।

केन्द्रका अनुसार विगत तीन महिनामा ८४ करोड ७७ लाख रुपैयाँ बराबरको २० लाख ४० हजार किलो मरिच भित्रिएको छ । त्यस्तै ४६ करोड ८८ लाख रुपैयाँ बराबरको २० लाख ५५ हजार किलो चकलेट भित्रिएको छ । चिनीजन्य मिठाई २७ करोड ८८ लाख, पानसुपारी २७ करोड ५९ लाख, काजु २३ करोड ३७ लाख रुपैयाँको भित्रिएको छ ।

सुख्खा नरिवाल, बदाम, हाडे बदाम, ओखरलगायत तीन दर्जन बढी मसला पनि करोडौंको रुपैयाँको आयात भएको केन्द्रको तथ्यांक छ ।

‘यो वर्षको तिहार केही ढिलो पर्नाले आवश्यक मसला भित्रिरहेको छ,’ वरिष्ठ अधिकृत बजगार्इं भन्छन्, ‘प्रत्येक वर्ष आयात बढिरहेको छ । गएको वर्ष पौने चार अर्बको मसलाहरु भित्रिएको थियो । यस वर्ष करिब चार अर्ब पुग्ने देखिन्छ ।’ 

केन्द्रको तथ्यांकअनुसार अघिल्लो आवको सुरुको तीन महिना अर्थात् तिहारसम्म ३ अर्ब ७४ करोड ७९ लाख रुपैयाँको मसला आयात भएको थियो । एक अर्ब ३८ करोड रुपैयाँ बराबरको ३१ लाख १५ हजार किलो मरिच, ४० करोड ६१ लाख रुपैयाँ बराबरको ६ लाख ७५ हजार किलो चकलेट र २२ करोड ५० लाख रुपैयाँ बराबरको तीन लाख ७ हजार किलो काजु भित्रिएको थियो ।