मोदीको जनकपुर भ्रमण रद्द, राजनाथ र योगी आउने

जनकपुरधाम- रामजानकी विवाहपञ्चमीको अवसर पारेर जनकपुर आउने भनिएका भारतीय प्रधानमन्त्री नरेन्द्र मोदीले जनकपुर भ्रमण रद्द गरेका छन् । स्रोतका अनुसार विवाहपञ्चमीको अवसरमा अब भारतीय गृहमन्त्री राजनाथ सिंह र उत्तर प्रदेशका मुख्यमन्त्री योगी आदित्यनाथ आउने भएका छन् ।

विवाहपञ्चमीको अवसरमा भारतीय प्रधानमन्त्री जनकपुर पुगेर भारतको आर्थिक सहयोगमा नवनिर्मित जनकपुर-जयनगर रेलसेवा उद्घाटन गर्ने चर्चा थियो । तर विवाहपञ्चमी आउन केहिदिन मात्र बाँकी रहँदा भारतीय प्रधानमन्त्री मोदीको जनकपुर भ्रमण रद्द भएको बताइएको छ । मोदीले यसअघि २९ वैशाखमा आफ्नो चौथो नेपाल भ्रमण जनकपुरबाट सुरु गरेका थिए ।

भारतीय आन्तरिक राजनीति र यही नोभेम्बर २० देखि हुन लागेको राज्यसभा चुनावका कारण मोदीले जनकपुर भ्रमण स्थगित गरेको बताइएको छ । नोभेम्वर २० देखि ७ डिसेम्बरसम्म भारतको छत्तिसगढ, मध्यप्रदेश, राजस्थान र तेलांगना राज्यमा विधानसभा चुनाव हुँदैछ । भाजपाले मोदीलाई चुनावी कार्डको रुपमा प्रयोग गर्दै आफ्नो सम्पूर्ण बल ती राज्यका निर्वाचनमा लगाइरहेकोले मोदीको जनकपुर भ्रमण रद्द भएको अधिकारीहरुले बताएका छन् ।

यद्यपी परराष्ट्र मन्त्रालयका तर्फबाट पठाइएको औपचारिक निम्तोको भारतले जबाफ पठाइसकेको छैन् । भारतमा हुन लागेको लोकसभा निर्वाचनमा ‘हिन्दुत्व’ को कार्ड प्रयोग गर्न पनि मोदी रामजानकी विवाहोत्सवमा जनकपुर आउन सक्ने अनुमान गरिएको थियो । यसअघि मोदी भारतको केरल विधानसभा निर्वाचनकै बेला जनकपुर भ्रमण गरेका थिए ।