बाढीपहिरोले दुई राजमार्गमा यातायात सम्पर्क विच्छेद

काठमाडौं– सडक विभागले निरन्तरको वर्षापछि आएको बाढीपहिरोका कारण हालसम्म दुई राजमार्ग पूर्णतया अवरुद्ध रहेको जनाएको छ। बाढीपहिरोकै कारण १८ वटा राजमार्ग एकतर्फी मात्रै सञ्चालनमा रहेको विभागको विज्ञप्तिमा उल्लेख छ।

पाँचथरको हेवा खोलाले पुल बगाउँदा केचना–चन्द्रगढी, चारआली–इलाम–फिदिम गणेशचोक–ताप्लेजुङ–ओलाङचुङगोला जोड्ने मेची राजमार्ग अवरुद्ध भएको हो।

विभागका अनुसार चतरा–मूलघाट–माझीटार–अमरापुरडाँडा–गणेशचोक जोड्ने तमोर करिडोर सडक पनि हेवा खोलाकै पुल बहेपछि अवरुद्ध छ।मनसुन सुरू भएयता १७ वटा सडक ८९ स्थानमा अवरूद्ध भएको थियो।

बाढीपहिरोले राजमार्गमा रहेका पुल बगाउँदा हालसम्म २४ करोड ९६ लाख क्षति भएको प्रारम्भिक अनुमान विभागको छ।