भारतीय नोटसहित एकजना पक्राउ

वीरगञ्ज–पर्सा प्रहरीले भारतीय रुपैयाँसहित फेरी एकजनालाई पक्राउ गरेको छ । रक्सौल सीमानाका हुँदै नेपालतर्फ आउँदै गरेको अवस्थामा प्रहरीले वीरगंज महानगरपालिका–१३ राधेमाई बस्ने ४५ वर्षीय विजय साह कलवारलाई पक्राउ गरेको हो ।

रक्सौल नाकाबाट अवैध रुपमा विदेशी मुद्रा भित्र्याई रहेको गोप्य सूचनाको आधारमा सवारी साधनका साथै पैदल यात्रीको समेत चेकजाँच गरेको थियो । भारतबाट पैदल आइरहेका कलवारको शरीर चेकजाँच गर्दा भारतीय मुद्रा २ हजार दरको नोट एक सय थान जम्मा दुई लाख र पाँच सय दरको नोट ६० थान भारु ३० हजार गरी कुल २ लाख ३० हजार फेला परेको पर्सा प्रहरीले जनाएको छ।

नियन्त्रणमा लिइएका भारतीय नोटसहित आवश्यक कारबाहीका लागि कलवारलाई राजश्व अनुसन्धान विभाग ललितपुर पठाइएको जिल्ला प्रहरी कार्यालय पर्साले जनाएको छ ।

यसअघि पर्सा प्रहरीले आइतबार प्रतिबन्धित भारु पाँच सय दरको चार सय नोटसहित सीमावर्ती रक्सौल बस्ने १९ वर्षीय रोहित शर्मालाई पक्राउ गरेको थियो ।