घुससहित अख्तियारको फन्दामा सहायक वनअधिकृत 

उदयपुर-अख्तियार दुरुपयोग अनुसन्धान आयोगको टोलीले आइतबार एक सहायक वनअधिकृतलाई घुस रकमसहित उदयपुरबाट पक्राउ गरेको छ ।

अख्तियारको टोलीले सव डिभिजन वन कार्यालय नेपालटारमा कार्यरत सहायक वन अधिकृत सत्य नारायण साह रौनियारलाई घुस रकमसहित पक्राउ गरेको हो ।

अख्तियार दुरुपयोग अनुसन्धान आयोगको बर्दिवास कार्यालयबाट गएको टोलीले रौनियारलाई सेवाग्रहीबाट लिएको ६० हजार घुस रकमसहित त्रियुगा नगरपालिका–१२ स्थिक सम्पर्क कार्यालयबाट पक्राउ गरेको छ ।

सहायक वन अधिकृत रौनियारले सामुदायिक वन उपभोक्ता समितिको काठको टुनटुक्राको घटगद्दी मिलाई दिने बहानामा सेवाग्रहीसँग ६० हजार घुस मागेको अख्तियारले जनाएको छ । रौनियारले सेवाग्रहीबाट घुस मागेको सूचनाको आधारमा अख्तियारको टोली त्यहाँ पुगेको थियो ।

रौनियारलाई नियन्त्रणमा लिइ थप अनुसन्धान भइरहेको अख्तियार दुरुपयोग अनुसन्धान आयोगको बर्दिवास कार्यालयका तरुण कुमार कर्णले जानकारी दिएका छन् ।