बोक्सीको आरोपमा कुटिइन् मनतोरिया

जनकपुरधाम-महिला हिंसा अन्त्यगर्न विभिन्न खाले सचेतनामूलक कार्यक्रमहरु सञ्चालन भइरहेको बेला बोक्सीको आरोपमा धनुषामा एक महिलामाथि कुटपिट भएको छ ।

धनुषाको धनौजी गाउँपालिका-२ बस्ने ३८ वर्षीया मन्तोरिया देवी मण्डललाई तथाकथित जातीय पञ्चहरुले बोक्सी भन्दै कुटपिट गरेका छन् ।

जेठान ईन्दल मण्डल खत्वे मनतोरिया बोक्सी रहेको भन्दै आरोप लगाएका थिए । उनलाई बोक्सी स्वीकार गर्न स्थानीय पञ्चहरुलाई ५० हजार र भोजगर्न ५० हजार गरी १ लाख जरिवाना तोकिएको थियो ।

९ कार्तिकमा बसेको पञ्चायतमा मनतोरियाले जरिवाना दिन अस्वीकार गरेपछि उनीमाथि कुटपिट भएको थियो । मनतोरियाले भनिन्,‘जेठाजु ईन्दलले जर्बजस्ती बोक्सी स्वीकार गराउन म माथि जाइलागेका थिए । जातीय पञ्चहरुलाई बोलाई कुटपिट गर्दै बोक्सी रहेको स्वीकार गराएरै छोडे ।’

पञ्चायतमा खत्वे समाजका स्थानीय माइजन(प्रमुख) फुलगेन मण्डल, दुखी मण्डल, वीरेन्द्र मण्डलसहित जेठान ईन्दलले लछारपछार गर्दै कुटपिट गरेको आइतबार प्रदेश २ का आन्तरिक मामिला तथा कानुनमन्त्री ज्ञानेन्द्रकुमार यादव अगाडी दुखेसो पोखिन् ।

चार छोराछोरीकी आमा मनतोरियाले वैदेशिक रोजगारमा रहेका आफ्ना पतिलाई फोन गरेर घटनाका सम्पूर्ण वृतान्त सुनाएपछि पतिले स्थानीय जनप्रतिनिधि नजिक पुगेर न्यायका माग्न सुझाव दिएका थिए ।

तर धनौजी गाउँपालिकाका-२ का वडाअध्यक्ष राजकुमार साहले भने पञ्चहरुले गरेको निर्णय स्वीकार गरी गाउँमै मिल्न सुझाव दिएको मनतोरियाको भनाइ छ ।

आफूमाथि कुटपिट गर्ने व्यक्तिलाई कारबाही र न्यायको माग गर्दै मनतोरियाले जिल्ला प्रहरी कार्यालय धनुषा अन्तर्गत रहेको महिला तथा बालबालिका सेवा केन्द्रमा उजुरी दर्ता गराएकी छिन् ।

आन्तरिक मामिलामन्त्री यादवले न्याय दिलाउन मनतोरियालाई आश्वासन दिएका छन् । घटनाको सत्यतथ्य पता लगाएर दोषीमाथि यथाशीघ्र कारबाही प्रक्रिया अगाडी बढाइने मन्त्री यादवले प्रतिवद्धता दिएका छन् ।