केशव स्थापितको मुखमा केपी ओलीको ताला  

काठमाडौं- ‘अहिले केही नबोलौं, अध्यक्षसँग भेट गर्छु पहिला’, नेपाल समयको एक जिज्ञासामा यसरी पन्छिए केशव स्थापित । उनी शुक्रबार तीन नम्बर प्रदेशको भौतिक विकास तथा पूर्वाधारमन्त्रीबाट बर्खास्तमा परेका थिए ।

सात प्रदेश मध्ये छ प्रदेशमा नेकपाको सरकार छ । प्रदेश सरकारबाट बर्खास्त हुने मन्त्रीमा स्थापित पहिलो हुन् । उनीमाथि मुख्यमन्त्री डोरमणि पौडेललाई दुव्र्यवहार गरेको आरोप छ । तर स्थापितले आफूले मुख्यमन्त्रीलाई कुनै दुव्र्यवहार नगरेको दाबी गर्दै आएका छन् । उनले भने, ‘मेरो बोली अलि ठूलो छ त्यसैले त्यस्तो देखिएको हुन सक्छ ।’ 

नेताहरू आफ्नो बोलीका कारण बेलाबेलामा विवादमा पर्दै आएका छन् । सार्वजनिक पदधारण गरेको व्यक्तिले प्वाक्क बोल्दा पद चिप्लिएको इतिहास छ । संघीय सरकारमा कानुनमन्त्री रहेका शेरबहादुर तामाङ सार्वजनिक रूपमा विवादास्पद अभिव्यक्ति दिएका कारण राजीनामा दिएर हट्नुपरेको थियो । बोलीकै कारण मन्त्री पदबाट हात धुनेमा तामाङ संघीय सरकारका पहिला मन्त्री हुन् । 

प्रदेश सरकारको मन्त्रीबाट हटाइएका स्थापितले कुनै प्रतिक्रिया दिएका छैनन् । उनी निकट स्रोतका अनुसार प्रधानमन्त्री केपी शर्मा ओलीले यस विषयमा तत्काल प्रतिक्रिया नदिन निर्देशन दिएका छन् । स्थापितले आफ्ना निकटस्थहरूसँग पहिला आफूले अध्यक्ष ओलीलाई भेट्ने र त्यसपछि मात्र अभिव्यक्ति सार्वजनिक गर्ने बताउने गरेका छन् । स्थापितले आफूलाई अध्यक्ष ओलीले नै मन्त्री बनाएको र उनले नै हटाएको बताउँदै आएका छन् । जसले बनायो उसले हटायो भनेर उनले मुख्यमन्त्री पौडेललाई ‘बाइपास’ गरेका छन् । 
 

केशवको बर्खास्तीमा कैलाशको चिलाइ मराइ

केशव स्थापित र कैलाश ढुंगेल अहिले दुवै प्रधानमन्त्री केपी शर्मा ओली निकट मानिन्छन् । तर गुटगत हिसाबमा ढुंगेल ओली समूहका आग्र्यानिक र स्थापित रासायनिक नेता हुन् । स्थापित कुनै बेला वामदेव गौतमका प्रिय पात्र थिए । नेकपा संस्थापन पक्षले सुरुदेखि नै ओली समूहमा रहँदै आएकालाई अग्र्यानिक र गुट फेरेर पछि आएकालाई रासायनिक भन्ने गरेका छन् । 

स्थापित र ढुंगेल दुवै ओली पक्षका भए पनि आन्तरिक रूपमा सरकार बनेदेखि नै उनीहरुबीच सम्बन्ध राम्रो थिएन । स्थापित आफैं मुख्यमन्त्रीका दाबेदार थिए । तर अष्टलक्ष्मी शाक्यसँग चुनाव लडाएर डोरमाणिलाई जिताइयो । 

प्रदेश ३ का आर्थिक मामला तथा योजनामन्त्री ढुंगेल मुख्यमन्त्री पौडेलका दाहिने हात छन् । ढुंगेल पार्टीका केन्द्रीय सदस्य हुन् । त्यसकारण प्रदेश सरकारमा मुख्यमन्त्रीपछि ढुंगेलको दाबी थियो । तर मुख्यमन्त्री पौडेलले प्रधानमन्त्रीको निर्देशनमा स्थापितलाई प्रदेश सरकारको वरीयतामा दोस्रो बनाएका थिए । त्यसपछि ढुंगेल तनावमा थिए । 

तर स्थापित दोस्रो भए पनि ढुंगेल पौडेलको किचेन क्याबिनेटमा थिए । त्यसपछि स्थापित र ढुंगेलबीच झनै दूरी बढेको थियो । स्थापित सरकारभित्रका प्रतिपक्षी मन्त्रीजस्ता थिए । त्यसैले सरकार बनेदेखि नै उनीहरुबीच राम्रो सम्बन्ध थिएन । 

स्थापितलाई प्रदेश सरकारबाट हटाइए पनि उनी प्रधानमन्त्रीको समूहबाट हटेका छैनन् । स्थापितको स्वभावअनुसार यतिबेला उनले प्रधानमन्त्री र मुख्यमन्त्रीविरुद्ध मिडियामा आगो ओकल्थे । तर सरकारबाट हटाएको विषयमा बाहिर केही नबोल्न प्रधानमन्त्रीले निर्देशन दिएपछि स्थापित चुप लागेर बसेका छन् । प्रधानमन्त्रीले उनलाई फकाएर असन्तुष्टि निल्न लाउँछन् वा उनले कुनै दिन ताला फोरेर आगो ओकल्छन् ? यो भने प्रधानमन्त्रीसमेत रहेका नेकपाका अध्यक्ष ओलीमै निर्भर रहनेछ ।