अस्ताए सूर्यध्वजाबाहक तुलाधर

काठमाडौं-वामपन्थी मानवअधिकारवादी नेता पद्मरत्न तुलाधरको निधन भएको छ। आइतबार दिउँसो एकबजे उपचारका क्रममा नर्भिक अस्पतालमा उनको निधन भएको हो ।

तुलाधरलाई अकास्मात हृदयघात भएपछि केही दिन अघि अस्पताल पुर्‍याइएको थियो। ०४३ सालमा राष्ट्रिय पञ्चायत सदस्य निर्वाचित तुलाधार २०४८ र ५२ सालमा काठमाडौं क्षेत्र नं ४ बाट प्रतिनिधिसभा सदस्य निर्वाचित भएका थिए। 

उनले २०४३ सालमा सूर्य चुनाव चिन्ह लिएका थिए। पछि नेकपा एमालेले सो चिन्ह प्रयोग गरेको थियो। अहिले पनि नेकपाले सोही चिन्ह प्रयोग गर्दै आईरहेको छ। 

वाम बुद्धिजीवी एवं मानवाधिकारकर्मी स्व पद्मरत्न तुलाधरप्रति श्रद्धाञ्जलि व्यक्त गर्न विभिन्न राजनीतिक दलका नेता नर्भिक अस्पताल पुगेका छन्।

नर्भिक पुगेका नेकपाका वरिष्ठ नेता माधवकुमार नेपालले पत्रकारसँग कुरा गर्दै तुलाधरले प्रजातन्त्र पुनःस्थापना, मानवाधिकार र शान्ति प्रक्रियामा खेलेको भूमिका महत्वपूर्ण रहेको बताए। पूर्वप्रधानमन्त्री नेपालले भने, 'नेपाल संवत्लाई राष्ट्रिय मान्यता दिन पद्मरत्नले खेलेको भूमिका कहिल्यै बिर्सन सकिन्न ।' 

अस्पतालमै पुगेका नयाँ शक्ति पार्टीका संयोजक डा बाबुराम भट्टराईले तुलाधार लोकतान्त्रिक आन्दोलनका खम्बा, तथासबैका आदरणीय आदर्शवान र निष्ठावान् व्यक्तित्व भएको प्रतिक्रिया बताए । स्वर्गीय तुलाधरप्रति श्रद्धाञ्जलि व्यक्त गर्न शिक्षा, विज्ञान तथा प्रविधिमन्त्री गिरिराजमणि पोखरेल पनि अस्पताल पुगेका थिए।

मस्तिष्काघात भएर अस्पताल भर्ना भएका उनको छातीको गम्भीर सङ्क्रमणबाट मृत्यु भएको हो । नेपाल संवत्लाई राष्ट्रिय मान्यता दिलाउन महत्वपूर्ण भूमिका खेलेका पूर्व स्वास्थ्य तथा श्रममन्त्री तुलाधरले नेपालको शान्ति प्रक्रियामा पनि ठूलो योगदान पुर्‍याएका छन्।

स्व तुलाधरका श्रीमती, दुई छोरा र दुई छोरी छन् । उनको सोमबार शोभाभगवतीमा अन्तिम संस्कार गरिने बताइएको छ ।