बलात्कारको गलत रिपोर्टदिने डाक्टरविरुद्ध भ्रष्टाचार मुद्दा, चिकित्सक संघको विरोध

जनकपुरधाम-बालिका बलात्कारसम्बन्धी घटनामा गलत रिपोर्ट दिने जनकपुर अञ्चल अस्पतालका दुई डाक्टरविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दर्ता गरेको छ । अख्तियारले गलत रिपोर्ट दिने डा.विजयकुमार सिंह र डा. रम्भा गोइतलाई पक्राउ गरेर भ्रष्टाचार मुद्दा दायर गरेको हो ।

दुबैजनाले सरकारी चिकित्सक पद दुरुपयोग गरी भ्रष्टाचार गरेको भन्दै विशेष अदालत काठमाडौंमा शुक्रबार मुद्दा दायर गरेको छ । तर गलत रिपोर्ट दिने डाक्टरविरुद्ध अख्तियारले कारबाही अगाडी बढाउँदा नेपाल चिकित्सक संघ विरोधमा उत्रिएको छ । डा.सिंह र डा.गोइतलाई अनुसन्धानका लागि थुनामा राखिएकोमा चिकित्सकहरुको छाता संगठन नेपाल चिकित्सक संघले विरोध जनाएको हो ।

परीक्षणकै क्रममा हुन गएको त्रुटीका कारण मेडिकल काउन्सिलले कारबाही गरिसकेको र मुद्दा अदालतमा विचाराधीन रहेको भन्दै चिकित्सक संघले रिहाइको माग गरेको छ । यसैगरी चिकित्सक संघको जनकपुर अञ्चल शाखाले हिरासतमा रहेको दुबै डाक्टर यथाशीघ्र रिहा नभए कडा कदम चाल्न बाध्य हुने र त्यसबाट बिमारीमा पर्न जाने क्षतिको जिम्मेबार सम्बन्धित निकाय हुने विज्ञप्तीमार्फत चेतावनी दिएको छ ।

इलाका प्रहरी कार्यालय खजुरी धनुषाले गरेको अनुसन्धानमा एक १२ वर्षीया बालिकाको बलात्कारसम्बन्धी स्वास्थ्य परीक्षणमा गलत रिपोर्ट पाइएको थियो । डा.सिंह र गोइतले गलत रिपोर्ट दिएको आरोपमा काउन्सिलले कारबाही गर्दै दुबैजनाको लाइसेन्स रोक्का गरिसकेको छ । काउन्सिलले २५ असोजमा उनीहरुको लाइसेन्स रोक्का गर्दै चिकित्सकीय अभ्यास गर्न रोक लगाएको थियो ।

बलात्कारबाट पीडित बालिकाको स्वास्थ्य परीक्षणको उनीहरुले गलत रिपोर्ट दिएका थिए । तर खजुरी प्रहरीले जनकपुर अञ्चल अस्पतालको स्वास्थ्य परीक्षण रिपोर्टबाट सन्तुष्ट नभएपछि सिरहा अस्पतालमा बालिकाको स्वास्थ्य परीक्षण गराएका थिए । सिरहा अस्पतालमा गरिएको स्वास्थ्य परीक्षण रिपोर्टमा बालिकासँग बलात्कार भएको ठहर भएको थियो ।