आजका अखबार : मन्‍त्रीलाई हटाउन मुख्यमन्‍त्रीको लविङ

काठमाडाैं- राजधानीबाट प्रकाशित शुक्रबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

कसैले तीन नम्बर प्रदेशका मुख्यमन्त्री र मन्त्रीबीच चर्को विवाद भएको विषयलाई मुख्य समाचार बनाएका छन् भने कसैले निर्मला पन्तको बलात्कार पछि हत्या भएको १०० दिन पुग्दा समेत अझै अपराधी पत्ता लाग्न नसकेको विषयलाई प्राथमिकतामा पारेका छन् । 

प्रधानमन्त्री आज डिस्चार्ज हुँदै शीर्षकमा एङ्कर न्यूज छापेको आजको नयाँ पत्रिकाले आन्तरिक तनावमा प्रदेशका मन्त्रिपरिषद् शीर्षकमा मुख्य समाचार छापेको छ । तीन नम्बर प्रदेशका मुख्यमन्त्री डोरमणी पौडेल र भौतिक पूर्वाधार तथा विकासमन्त्री केशव स्थापितबीच विवाद हुँदा तनाव बढेको हो । मुख्यमन्त्री पौडेलले आफूसंग अभद्र व्यवहार गरेको भन्दै मन्त्री स्थापितलाई हटाउने कसरतमा लागेको समाचारमा जनाइएको छ । 

यस्तै अन्य प्रदेशमा पनि आन्तरिक विवाद चर्किएको नयाँ पत्रिकाले लेखेको छ। कर्णली प्रदेशमा मन्त्रीको राजीनामा मागिएको छ भने दलको नेत को बन्ने भन्ने विषयमा पनि विवाद देखिएको छ । प्रदेश १ मा मन्त्रिपरिषद् अझै अपूर्ण रहेको छ भने राजधानीमा मन्त्रीहरुबीच नै विवाद देखिएको छ । प्रदेश २ मा गठबन्धन र दलभित्रै पनि विवाद देखिएको छ । सुदुरपश्चिममा राजधानी तोकिए पनि विवाद कायमै रहेको समाचारमा उल्लेख छ ।  

आजको अन्नपूर्ण पोस्ट्ले पनि तीन नम्बर प्रदेशका मुख्यमन्त्री र मन्त्रीबीच विवाद भएको विषयलाई मुख्य समाचार बनाएको छ । मुख्यमन्त्री–मन्त्री भनाभन शीर्षकमा खबर लेखेको अन्नपूर्णले भौतिक पूर्वाधार तथा विकासमन्त्री केशव स्थापितलाई हटाउन मुख्यमन्त्री डोरमणी पौडेलले लविङ थालेको उल्लेख गरेको छ ।

यस्तै ललितपुरको बाग्मति गाउँपालिकाका अध्यक्षसहित अधिकांश पदापधिकारी र कर्मचारी कार्यलय खाली गरेर विदेश भ्रमणमा गएको विषयलाई पनि प्राथमिकता दिएको छ । 

यस्तै आजको नागरिक दैनिकले निर्मला हत्याको सय दिन : हत्यारा अझै पत्ता लागेन शीर्षकमा मुख्य समाचार छापेको छ । अनुसन्धान सही दिशामा नगरेको, प्रमाण नष्ट गरेको र निर्दोषलाई दोषी करार गर्न यातना दिएको आरोप खेपेको प्रहरीले  चित्त बुझ्दो तथ्य बाहिर ल्याउन सकेको छैन् । अहिलेसम्म प्रहरीको अनुसन्धान शून्यमा रहेको समाचारमा उल्लेख छ । यसै विषयलाई नयाँ पत्रिकाले पनि महत्वका साथ प्रकाशित गरेको छ । 

यस्तै नागरिकले महाधिवेशन आउन डेढ वर्ष छँदै कांग्रेसमा महाधिवेशनको राप लागेको विषयलाई पनि प्राथमिकतामा पारेको छ । केन्द्रदेखि गाउँसम्मका नेता कार्यकर्ताहरुले  महाधिवेशतर्फ ध्यान केन्द्रित गर्न थालेका छन् । नागरिकले तिहार नजिकिँदै गर्दा आठ करोडको तास आयात भएको विषयालाई पनि महत्वका साथ छापेको छ । 

नेपाल मलेसिया श्रम समझदारी तत्काल कार्यान्व्यन गर्न अप्ठेरो परेको विषयलाई एङ्कर न्यूज बनाएको आजको कान्तिपुरले चिनीमा चुपचाप शीर्षकमा मुख्य समाचार छापेको छ मुल्य घटाउने र कोटा खारेज गर्ने सिफारिससहितको उपसमितिको प्रतिवेदन लेखा समितिले थन्क्याएको समाचारमा उल्लेख छ ।