नेयमारका आइडल मेस्सी, रोनाल्डो दानव

एजेन्सी- ब्राजिल तथा पेरिस सेन्ट जर्मेन (पीएजी)का सुपस्टार फरवर्ड खेलाडी नेयमारले आफ्नो आइडल बार्सिलोनाका पूर्व सहकर्मी लियोनल मेस्सी रहेको बताएका छन् । नेयमारले मेस्सीलाई आफ्नो आइडल मान्दा पोर्चुगिज ताथा युभेन्ट्सका स्टार खेलाडी क्रिस्टियानो रोनाल्डोलाई फुटबलका दानवको संज्ञा दिए । 


बार्सिलोनामा मेस्सीसँगै चार बर्ष बिताएका नेयमारले अन्तराष्ट्रिय सञ्चार माध्यममा यस्तो अभिव्यक्ती दिएका हुन् । बास्केटबलका उत्कृष्ट खेलाडी स्टेफन करीसँगको भेटमा मेसी र रोनाल्डोको प्रशंसा गर्दै नेयमारले उनीहरुबाट आफुले धेरै सिकेको बताएका हुन् ।

‘मैले मेसीसँग खेले । उनी मेरो लागि सर्वकालिन उत्कृष्ट खेलाडी मध्येका एक हुन् । फुटबलमा उनी मेरो आदर्श हुन् ।’ उनले भने, ‘मैले मेसीबाट हरेक दिन सिके, अभ्यास र खेलका दौरान । त्यस्तै हेरेर पनि सिके । जसले मलाई थप बलियो र आफ्नो क्षमता बढाउनका लागि मद्दत गर्यो ।’ 


त्यस्तै नेयमारले रोनाल्डोका विषयमा पनि आफ्नो अनुभव साटेका थिए । ‘रोनाल्डोको सामना गर्न पाउनु गर्वको विषय हो । उनीसँग खेल्दा निकै तयार अवस्थामा रहनुपर्ने हुन्छ,’ उनले भने, ‘उनी उत्कृष्ट खेलाडी मध्येका एक हुन् । निकै चलाख छन् । उनीबाट पनि धेरै सिक्ने चिज छन् ।’

नेयमारले मेसी र रोनाल्डो विषयमा थपे, ‘उनीहरु फुटबलका दुई ठूला नाम हुन् । त्यसैले उनीहरुसँगको प्रसंग छोडिन्छ । म उनीहरुभन्दा बढी भन्दा बढी सिक्न, बढी भन्दा बढी उपाधि जित्न र बढी भन्दा बढी गोल गर्न चाहन्छु । त्यसले उनीहरबाट हरेक दिन केहि न केहि सिक्ने विषय हुन्छ ।’


स्पेनमा रहँदा रोनाल्डोको पटक पटक सामना गरेका नेयमार गत वर्ष विश्व किर्तीमानी मुल्य १ सय ९८ मिलियन पाउन्डमा पीएसजी पुगेका थिए । चार बर्ष मेसी, नेयमार र अर्का फरवार्ड लुइस स्वारेज एक साथ क्लबको अग्रपंक्तिमा रहँदा बार्सिलोनाले २ ला लिग, ३ कोपा डेल रे र एक पटक च्याम्पियन्स लिग जितेको थियो ।