नापी कार्यालय सर्वेक्षक दुर्इ लाख घुससहित पक्राउ

 जनकपुरधाम- नापी कार्यालयका एक कर्मचारी दुई लाख घुस रकमसहित रंगेहात पक्राउ परेका छन्। नापी कार्यालयका सर्वेक्षक देवनारायण चौधरी दुई लाख घुससहित पक्राउ परेका हुन्।

अख्तियार दुरुपयोग अनुसन्धान आयोगको बर्दिवास कार्यालयबाट गएको टोलीले चौधरीलाई घुस लिइसकेको अवस्थामा कार्यालयबाट  पक्राउ गरेको हो। चौधरीले नाप नक्सा बमोजिम जग्गाको क्षेत्रफल सच्याइ धनीपूर्जामा कायम गरिदिने बहानामा सेवाग्रहीसँ दुई लाख घुस मागेको सूचनाको आधारमा अख्तियारको टोली नापी कार्यालय लहान पुगेको थियो।

चौधरीलाई सेवाग्रहीबाट दुई लाख घुस लिइरहेको अवस्थामा पक्राउ गरिएको अख्तियारको बर्दिवास कार्यालयले जानकारी दिएको छ । पक्राउ परेका चौधरीलाई नियन्त्रणमा लिई थप अनुसन्धान भइरहेको अख्तियारको बर्दिवास कार्यालयका तरुणकुमार कर्णले जानकारी दिएका छन्।