१०१ बर्षमा नागरिकताको प्रमाणपत्र

धनगढी-डोटीमा १०१ बर्षीया एक महिलाले पहिलो पटक नेपाली नागरिकताको प्रमाण पत्र पाएकी छिन्।

डोटीको पुर्वी चौकी गाउपालिला-७ गाजरीकी जगुदेवि खड्काले जिल्ला प्रशासन कार्यालय सिलगढी मै पुगेर नागरिकताको प्रमाण पत्र लगेकि हुन् ।

उमेर १०१ वर्ष पुगे पनि स्वस्थ देखिने जगुदेविलाई प्रमुख जिल्ला अधिकारी यादव सुबेदीले नागरिकताको प्रमाण पत्र प्रदान गरे । उनलाई जन्मेको बेला ब्राम्हणले बनाएको चिनाका आधारमा बुबा मैपति कुवरका नामबाट नागरिकता प्रदान गरिएको जिल्ला प्रशासन कार्यालयले जानकारी दिएको छ । 

श्रीमान पहिले नै बितेको र हालसम्म चिना कै आधारमा बृद्ध भत्ता बुझ्ने गरेको उनले सुनाईन्। सबै काममा नागरिकता अनिवार्य हुने कुरा बुझे पछि छोरालाई कर गरेर नागरिकता बनाउन सदरमुकाम सिलगढी लग्न भनेको उनले सुनाईन्। 

उनका चार छोरा मध्य तीन बितिसकेका छन् भने एक तेजसिंङ खड्का मात्र छन् । उनैले गाडीमा राखेर सिलगढी पुर्‍याएका हुन् ।