लोकसेवा आयोगको नयाँ कार्यतालिका सार्वजनिक

काठमाडौं- सरकारको आग्रहबमोजिम लोकसेवा आयोगले वार्षिक कार्यातालिका परिवर्तन गरेको छ । निजामती सेवाको विभिन्न पदमा रिक्त दरबन्दीमा पदपूर्तिका लागि विज्ञापन गर्ने समयावधी हेरफेर गर्दै कार्यतालिका परिवर्तन गरेको हो । 

परिवर्तित कार्यतालिका अनुसार आयोगले सहसचिव, उपसचिव तथा एघारौँ र नवौँ तहमा पदपूर्तिको विज्ञापन मंसिर अन्तिम साताको बुधबार प्रकाशित गर्ने भएको छ। यसअघि असोजमा लोकसेवा आयोगले यो विज्ञान प्रकाशित गथ्र्यो । सरकारले कर्मचारी समायोजन गर्न नसकेकै कारण विज्ञापन दुई महिना पर सार्न आग्रह गरेको थियो ।

संघीय मामिला तथा सामान्य प्रशासन मन्त्रालयले रिक्त दरबन्दीको विवरण दिन सकेको छैन्  । सरकारले रिक्त दरबन्दीको विवरणसहित आयोगसँग कर्मचारी माग गर्ने र आयोगले हरेक वर्ष खुल्ला विज्ञापनमार्फत कर्मचारी भर्ना गर्दै आएको थियो । 

तर, प्रदेश र स्थानीय तहको सेवा ऐन नबनी कर्मचारी समायोजन गर्न नसकिने, कर्मचारी समायोजन नभएसम्म कुन पदमा कति दरबन्दी रिक्त छ भन्ने यकिन नहुँदा लोकसेवा आयोगले विज्ञापन प्रकाशित गर्ने कार्यतालिका परिवर्तन भएको हो । 

आयोगको नियमित कार्यातालिकाअनुसार हरेक वर्ष असोजको अन्तिम बुधबारबाट रिक्त रहेको दरबन्दीमा पदपूर्तिका लागि विज्ञापन प्रकाशित गर्दै आएको थियो ।