डडेल्धुरामा बाख्रा चराउन गएकी बालिका मृत फेला

डडेल्धुरामा बाख्रा चराउन गएकी १० वर्षीया बालिका मृत भेटिएकी छन्। कक्षा ३ मा पढ्ने सानु बिक मृत फेला परेकी हुन्।

नवदुर्गा गाउँपालिका–५ लम्पाटीकी सानु गोठालो गएकी थिइन्। सदाझैं विद्यालयबाट फर्किएर बाख्रा चराउन जंगल गएकी सानु हिजो (मंगलबार) भने घर फर्किनन्।

साँझसम्म पनि घर नआएपछि आफन्तले उनको खोजी गरे। सानुका बुबा रोजगारीको सिलसिलामा भारतमा भएकाले उनकी आमा, दाजुदिदीले खोजी कार्यका लागि प्रहरीको सहयोग मागे। खोजी गर्ने क्रममा अस्थायी प्रहरी पोष्ट ठाँटाबजारबाट खटिएको प्रहरी टोलीले बुधबार उनको शव घरभन्दा एक किलोमिटर टाढा फेला पारेको थियो। 

बुधबार बिहान ६ बजेतिर सानुको शव झुन्डिएको अवस्थामा फेला परेको जिल्ला प्रहरी कार्यालय डडेल्धुराले जनाएको छ। मुचुल्काको काम सिध्याएर अहिले डडेल्धुरा अस्पतालमा शवको पोस्टमार्टम भइरहेको छ।
पोष्टमार्टम रिपोर्ट आएपछि मृत्युबारे थप खुल्ने प्रहरीले बताएको छ।

मृतकका आफन्तले हत्याको आशंका गरेका छन्। अमलाको रुखमा झुण्डिएको अवस्थामा फेला परेको शव जमिनमै पल्टिएको र घाँटीमा बाँधिएको डोरी खुकुलो भएका कारण सानुले आत्महत्या गरेको भन्नेमा विश्वास नलागेको काका पर्ने भीम विकले बताएका छन्।