विराटनगरमा बिहानैदेखि तनाव

कोशी प्रदेशसभाको बजेट अधिवेशन सुरू हुन लाग्दा विराटनगरमा बिहानैदेखि तनाव बढेको छ।

प्रदेशसभा बैठक दिउँसो २ बजेलाई बोलाइएको छ। तर, पहिचानको आधारमा प्रदेश नामकरण गर्नुपर्ने माग राख्दै आन्दोलन गरिरहेकाहरू बिहानैदेखि प्रदर्शनमा उत्रिएपछि प्रशासनले धरपकड सुरू गरेको छ।

आन्दोलनमा उत्रिएका लिम्बुवान भोलिन्टियर्सका १३ जना कार्यकर्तालाई प्रहरीले नियन्त्रणमा लिएको छ। प्रदेशसभालाई लक्षित गरेर प्रशासनले विराटनगर क्षेत्रमा निषेधाज्ञा पनि जारी गरेको छ। तर, आन्दोलनकारीहरूले बिहानैदेखि त्यसको अवज्ञा गर्दै प्रदर्शन गरिरहेका छन्।

गत पुस १७ गते प्रदेशसभा बैठकले कोशी प्रदेश नामकरण गरेको थियो। पहिचानवादीको प्रदर्शन र आन्दोलनका कारण प्रदेश सभाको बैठक नै नबसी हिउँदे अधिवेशन अन्त्य भएको थियो।