'चीनले नेपाललाई ऋण जालमा फसाउन खोज्यो'

काठमाडौं- राष्ट्रिय एकता अभियानका केन्द्रीय अध्यक्ष विनय यादवले चीनले नेपाललाई ऋण जालमा फसाउन रणनीति बनाइरहेको बताएका छन्। जनकपुरमा अभियानले आयोजना गरेको नेपालप्रति चिनियाँ अभ्यास र असर विषयक विचार गोष्ठीमा उनले चीनले नेपाललाई ऋण जालमा फसाई श्रीलंका बनाउन रणनीति बनाइरहेको बताएका हुन्।

उनले चीनले पछिल्लो समय नेपालमाथि विभिन्न कोणबाट आँखा लगाइरहेको टिप्पणी गरे। उनले भने, 'उत्तरतिरबाट नेपाली भूमि क्रमशः अतिक्रमण भइरहेको छ। चीनले देशभित्र राजनीतिक हस्तक्षेप गर्नुका साथै अघोषित नकाबन्दीलाई निरन्तरता दिइरहेको छ।'

उनले नेपाललाई चीनले तिब्बत बनाउने षड्यन्त्र गरिरहेको समेत दाबी गरे। उनले भने, 'चीनको तिब्बतीकरण गर्ने षड्यन्त्रको विरोधमा अब सम्पूर्ण नेपालीले एकजुट भई आवाज उठाउने बेला आएको छ।' गोष्ठीमा साहित्यविद् सुदर्शन लाल कर्णले नेपाललाई श्रीलंका बनाउने रणनीतिमा चीन लागेको आरोप लगाए। उनले भने, 'चीनले नेपाललाई श्रीलंका बनाउन खोजिरहेको छ। चीनले पोखरा विमानस्थलमा लगानी गरेर विमानस्थल कब्जामा लिने षडयन्त्र गरिरहेको छ।'

उनले चीनले बीआरआईमार्फत नेपाललाई ऋण जालमा पार्न विभिन्न कोणबाट कसरत गरिरहेको पनि जिकिर गरे। उनले भने,'चीनको विस्तारवादी नीतिलाई रोक्नुपर्छ। नेपाललाई चिनियाँ ऋणको जालमा फस्न दिनु हुँदैन।'
संविधानसभा सदस्य विपी यादवले चीनको विस्तारवादी नीतिलाई हामी सबै जना मिलेर नरोकेसम्म नेपालको विकास सम्भव नहुने जिकिर गरे। उनले भने, 'कहिले चीनका लागि नेपाली राजदूतको ओहोदा प्रमाणपत्र नबुझिदिने त कहिले काठमाडौंमा रहेको चिनियाँ दूतावासमार्फत चीनले नेपालको आन्तरिक राजनीतिमा हस्तक्षेप गर्न लगायतको काम गरिरहेको छ।'

धर्मिक अभियन्ता भोगेन्द्रलाल कर्णले सनातन संस्कृति नेपालको आत्मा भएको बताए। उनले भने,'समाजमा चलिरहेको जातीय द्वन्दलाई समाधान गर्न राष्ट्रीय एकता को सूत्र हिन्दू संस्कृति नै हो त्यसकारण देशलाई संघीय हिन्दू गणतन्त्र कायम गरी अघि बढ्नुपर्ने अहिलेको आवश्यकता रहेको छ।' 

कार्यक्रममा हिन्दी अभियन्ता रमन पाण्डेय, मारवाडी सेवा समितिका अध्यक्ष निर्मल चौधरी, डा. बीरेन्द्र कुमार, प्राध्यापक बालकेश्वर ठाकुर, धर्मिक अभियन्ता भोगेन्द्र लाल कर्ण, वन्दना पाण्डेय लगायतले चीनले नेपाललाई ऋण जालमा फसाई श्रीलंका बनाउन खोजिरहेको भन्दै सतर्क हुन जोड दिए।