उपचारपछि पहिलोपल्ट संसद्‌मा बोलेका चन्द्र भण्डारीले के भने?

नेपाली कांग्रेसका सांसद चन्द्र भण्डारीले जलनको उपचारका लागि अलग्गै अस्पताल भवन आवश्यक रहेको बताएका छन्। कीर्तिपुर अस्पताल र सुष्मा कोइराला अस्पतालले मात्र जलनको उपचार नधान्ने भएकाले अलग्गै अस्पताल आवश्यक रहेको उनको भनाइ छ।

सरकारले आगामी आर्थिक वर्ष ०८०/८१ का लागि ल्याएको नीति तथा कार्यक्रममाथिको छलफलमा प्रतिनिधिसभाको बुधबारको बैठकमा उनले बिजुली तथा ग्यास कसरी बाल्ने, बाटो कसरी काट्नेजस्ता व्यवहारिक कुरा विद्यालय तहदेखि नै समावेश गर्न पनि सरकारसमक्ष आग्रह गरे। उनले भने, ‘ग्यास कसरी बाल्ने, बिजुली कसरी बाल्ने भनेर तर हाम्रा विज्ञ र पाठ्यक्रम निर्माता कसैलाई पनि ध्यान भएन, सबैले नदी किनाराका ठूला ट्रक र डोजर नदीको किनारमा देख्छन्, तर बालुवा चालेर गिट्टी निकाल्ने जनता देख्दैनन्। यो अवस्था सबै क्षेत्रमा भयो।’

उनले मुटु, मिर्गौला, क्यान्सरका बिरामीलाई जस्तै जलनका बिरामीलाई पनि आर्थिक सहयोग गर्न र ग्यास उद्योगलाई कानुन बनाएर नियमन गर्न माग गरे। भण्डारीले आफू आगलागीबाट जलेर घाइते भएदेखि अहिलेसम्मको अवस्थामा ल्याउन सहयोग गर्ने सबैलाई धन्यवाद पनि दिए।

‘मलाई उद्धार गरेर यो अवस्थामा पुर्‍याउने सरकार, सांसद, शुभचिन्तक, डाक्टर, स्वास्थ्यकर्मी, यो अवस्थामा ल्याउने सबैलाई आभार व्यक्त गर्छु,’ उनले भने, ‘म गर्वका साथ भन्छु, अरु देशमा भन्दा हाम्रो देशमा डाक्टर कम छैनन्, कम्पिटेन्ट डाक्टर छन्, म गएको अस्पताल एसियाकै ठूलो अस्पताल त्यहाँको डाक्टर कीतिपुरमा ११/१२ जना छन्। यहाँका डाक्टर कम्पिटेन्ट छन्। हामीले एउटा अस्पताल बनायौं भने एसियाकै सबल अस्पताल बन्छ भनेर प्रधानमन्त्रीलाई आग्रह गरें।

गत फागुन ३ गते बुद्धनगरस्थित निवासमा भएको आगलागीमा जलेर घाइते भएका उनको मुम्बईस्थित नेसनल बर्न अस्पतालमा उपचार भएको थियो। उक्त घटनापछि उनले पहिलोपटक प्रतिनिधिसभामा सम्बोधन गरेका हुन्। दुर्घटना भएको दिन पनि उनले संसद् बैठकमा बोलेका थिए। त्यही बेलुका उनी आगलागीमा घाइते भएका हुन्। उनीसँगै घाइते भएको आमाको भने लगत्तै मृत्यु भएको थियो।