नक्कली भुटानी शरणार्थी प्रकरणः ३० जनाविरुद्ध मुद्दा दायर

काठमाडौं– प्रहरीले नक्कली भुटानी शरणार्थी प्रकरण छानबिनको प्रतिवेदन बुझाएपछि सरकारी वकिल कार्यालयले जिल्ला अदालत काठमाडौंमा ३० जनाविरुद्ध अभियोगपत्र (मुद्दा) दायर गरेको छ। सरकारी वकिलको कार्यालयले प्रहरीले बुझाएको अनुसन्धानको फाइल अध्ययनपछि आज अदालतमा मुद्दा दायर गरेको हो। 

प्रहरीले ५७ दिनसम्मको अनुसन्धानपछि रायसहितको अनुसन्धान प्रतिवेदन सरकारलाई बुझाएको थियो। पक्राउ परेका १६ जना र अन्य १४ प्रतिवादी बनाएर फाइल बुझाइएको छ।

११ चैतमा प्रहरीले यस प्रकरणमा तीन जनालाई पक्राउ गरेको थियो। प्रहरीले नक्कली शरणार्थी प्रकरणमा पक्राउ परेकालाई संगठित अपराध, ठगी, राज्य विरुद्धको अपराध कसुरमा कारबाही गर्ने सुझाव दिएको छ। तर सरकारी वकिल कार्यालयले सरकार कागजत किर्ते र एकीकृत कसुरसमेत यो मुद्दामा लगेको छ। 
३० जनाविरुद्ध साढे २८ करोड बिगो मागदाबीसहित अदालतमा मुद्दा दर्ता भएको हो। १२ चैत २०७९ मा काठमाडौं उपत्यका अपराध अनुसन्धान कार्यालयको टोलीले ललितपुरका सानु भण्डारी, मोरङ पथरी शनिश्चरेका केशवप्रसाद दुलाल र ललितपुरमा बस्दै आएका ४५ वर्षीय टंककुमार गुरुङलाई पक्राउ गरेको थियो। १५ चैतमा मोरङ पथरी घर भएका ४४ वर्षीय सागर राई पक्राउ परेका थिए।

दाङ घर भएका ३३ वर्षीय सन्देश शर्मा २९ चैतमा पक्राउ परेका थिए। २० दिनपछि प्रहरीले थप एक जनालाई पक्राउ गरेको थियो। १९ वैशाखमा तत्कालीन गृहमन्त्री रामबहादुर थापाका सल्लाहकार इन्द्रजित राई, २० वैशाखमा सरकारका सचिव टेकबहादुर पाण्डे नक्कली शरणार्थी प्रकरणमा पक्राउ परेका थिए।

२० वैशाखमै एमाले सचिव एवं पूर्वउप्रधानमन्त्री टोपबहादुर रायमाझी र उनका छोरा सन्दीपविरुद्ध पक्राउ पुर्जी जारी भएको थियो। सोही दिन बेलुकी बुटवलबाट टोपबहादुरका छोरा सन्दीप पक्राउ परेका थिए। प्रहरीले फरार रहेका टोपबहादुरसहितका रामशरण केसी र मोरङ घर भएका गोविन्द चौधरीलाई २६ वैशाखमा काठमाडौंबाट पक्राउ गरेको थियो।